د جینوا کنفرانس پایلې د مطبوعاتي کنفرانس له لارې له رسنیو سره شریکې شوې

 د لیدنۍ ۱۱مه ۱۳۹۷: د ولسمشرۍ عالي مقام د ویاند مرستیال ښاغلي شاه حسین مرتضوي او د مالیې وزارت ویاند او د اړیکو او عامه پوهاوي رئیس ښاغلي شمروزخان مسجدي، نن د لیندۍ میاشتې په ۱۱ مه نېټه د یو ګډ مطبوعاتي کنفرانس له لارې د جینوا کنفرانس پایلې د حکومت د رسنیو په مرکز کې له رسنیو سره شریکې کړې.

په دې کنفرانس کې د پلان وړاندې کولو په اړه د جینوا کنفرانس په مطروحه موضوعاتو، د سولې او پراختیا ملي چوکاټ سره سم نړیوالې ټولنې ته د افغانستان حکومت د لاسته راوړنو او اصلاحي اقداماتو د راپور، د لومړیتوب لرونکو ملي پروګرامونو، له نړیوالې ټولنې سره د دوه اړخیز حساب ورکولو چوکاټ او د افغانستان حکومت له پرمختګونو څخه د نړیوالې ټولنې د ستایلو په اړه له رسنیو سره معلومات شریک شول.

د مالیې وزارت ویاند او اړیکو او عامه پوهاوي رئیس ښاغلي شمروزخان مسجدي وویل چې له ټاکل شوي هدف څخه مو زیات ملي عواید راټول کړي دي. نوموړي زیاته کړه په روان مالي کال کې د ملي بودیجې په سند کې د عوایدو راټولیدو لپاره ۱۷۲ میلیارده افغانۍ هدف ټاکل شوی وو چې له نیکه مرغه موږ وکولی شول د مالي کال له پای ته رسیدو څخه مخکې ۱۷۳.۹۵ میلیارده افغانۍ راټولې کړو. د نوموړي په خبره تر اوسه د حکومت په کچه ۷۵ سلنه پراختیایې بودیجه لګول شوې ده چې د مالي کال تر پایه به د پام وړ زیاتوالی امومي.

د مطبوعاتي کنفرانس په پای کې د رسنیو پوښتنو ته ځوابونه هم وویل شول.