د مالي اقداماتو د نړیوالې ډلې سپارښتنو د څارنې او پلي کیدو کمېټه جوړه شوه
د افغانستان حکومت د پیسو وینځلو او د تروریزم تمویل سره د مبارزې او د مالي اقداماتو د نړیوالې ډلې (FAFT) سپارښتنو پلي کیدو په موخه د څارنې کمېټه جوړه کړه.
د دې کمېټې لومړۍ ناسته د ویډویې کنفرانس له لارې نن د وري میاشتې په ۵ مه نېټه د مالیې وزارت سرپرست او د زیربناء په چارو کې د ولسمشرۍ عالي مقام ستر سلاکار ښاغلي پروفیسور محمد همایون قومي، په مشرۍ جوړه شوه.
په دې ناسته کې د جلالتماب ولسمشر د فرمان پلي کیدو په تړاو بحث او د نظرونو تبادله وشوه.
د مالیې وزارت سرپرست وویل چې د مالي اقداماتو د نړیوالې ډلې د سپارښتنو پلي کول د ټولو دولتي ادارو دنده ده او په دې برخه کې هیڅ ډول ناغیړي د منلو وړ نه دی. نوموړي وویل چې د ادارو تخنیکي ټیمونه باید په دې برخه کې په ګډه کار وکړي.
د افغانستان بانک سرپرست او لومړي مرستیال ښاغلي واحد الله نوشیر وویل چې ټولې دولتي ادارې باید په دې برخه کې ځان مسؤل وګڼي او دا د افغانستان حکومت لپاره ډیره مهمه مسئله ده. نوموړي د (اف ای ټي اف) د لومړنۍ ارزونې په اړه کمېټې ته راپور وړاندې کړ ویې ویل چې دا ارزونه په ۱۳۹۷ کال کې پیل شوه او ۱۸ میاشتې یې دوام وکړ چې د افغانستان حکومت کړنې یې په ۲۲ برخو کې تر ارزونې لاندې ونیولې چې له نیکمرغه افغانستان د دې ډلې له خړ لیست څخه ووت. ښاغلي نوشیر وویل چې د دې ډلې دویمه ارزونه پیلیږي.
د مالیې وزارت سرپرست د راپور وړاندې کولو څخه د مننې تر څنګ وویل چې د مالي اقداماتو د نړیوالې ډلې سپارښتنو کره وخت او د ادارو مسؤلیتونه دې په سمه توګه روښانه شي او ټولې دولتي ادارې دې خپلې اړوندې چارې تر سره کړي.
په ناستې په پای کې پریکړه وشوه چې د مالي اقداماتو د نړیوالې ډلې له لوري له ارزونې څخه مخکې د افغانستان حکومت خپله یوه ارزونه وکړي څو تر سره شوي او پانې کارونه روښانه شي.
د یادونې وړ ده چې د مالي اقداماتو د نړیوالې ډلې سپارښتنو د څارنې او پلي کیدو کمېټه د جلالتماب ولسمشر د فرمان له مخې د مالیې وزارت سرپرست په مشرۍ د افغانستان بانک د رئیس، د مالي پالیسۍ او لوی اقتصاد رئیس، د مالیې وزارت د حقوقي بورډ د رئیس، د مالي شخړو حل کمېسیون د رئیس او د افغانستان بانک د معاملاتو تحلیل او مالي راپور ورکولو مرکز عمومي آمر په غړیتوب جوړه شوې ده.
