د مالیې وزارت سرپرست د افغانستان لپاره د قطر له لومړي سفیر سره وکتل
د مالیې وزارت سرپرست او د زېربناء په چارو کې د ولسمشرۍ عالي مقام ستر سلاکار ښاغلي پروفیسور محمد همایون قیومي، د وري میاشتې په ۳ مه نېټه د افغانستان لپاره د قطر لومړني سفیر ښاغلي سعید مبارک الخیارین الهاجري، سره په خپل دفتر کې وکتل.
په دې کتنه کې د قطر سفیر له دې هیواد سره د ډیپلماټیکو اړیکو په پیلیدو خوښي څرګنده کړه او د افغانستان او قطر ترمنځ د سوداګرۍ او اقتصادي کمېټې د پرانیستو غوښتونکی شو. نوموړي زیاته کړه، چې موږ غواړو د دواړو هیوادونو ترمنځ اقتصادي او سوداګریزې اړیکې د دوه اړخیزه کمېټو او د دواړو هیوادونو ترمنځ د مستقیمو هوایي دهلیزونو له لارې زیاتې کړو.
د مالیې وزارت سرپرست، د قطر د سفیر له وړاندیز څخه د هرکلي ترڅنګ د اړیکو په پراخېدو ټینګار وکړ او ویې ویل، خوښ یم چې د افغانستان وګړي په قطر کې کار کوي او موږ هم له قطر سره د اقتصادي او سوداګریزو اړیکو د پراخېدو غوښتونکي یو. نوموړي زیاته کړه، چې د دوه اړخیزه کمېټو او هوایي دهلیز موضوع به له اړوندو ادارو سره یاده کړي، څو یې تخنیکي کمېټې هر اړخیزه وڅېړي.
په دې کتنه کې د قطر سفیر د مالیې وزارت له سرپرست وغوښتل، څو دې هیواد ته سفر وکړي. د مالیې وزارت سرپرست، د هغوی د غوښتنې هرکلی وکړ او ویې ویل چې په مناسب فرصت کې به دې هیواد ته ورشي.
