مالیې وزارت نوماند وزیر او سرپرست د افغانستان لپاره د نړیوال بانک له رئیس سره د کرونا ویروس سره د مبارزې لپاره د یاد بانک د لا نورو مرستو په څرنګوالي خبرې وکړې
د مالیې وزارت نوماند وزیر او سرپرست ښاغلي عبدالهادي ارغندیوال نن غویې میاشتې په ۲ مه نېټه د افغانستان لپاره د نړیوال بانک له رئیس ښاغلي هنري کرالي سره د ویډیو کنفرانس له لارې خبرې وکړې.
په پیل کې دواړو د افغانستان جلالتماب ولسمشر او د نړیوال بانک د مرستیال تر منځ په وروستیو خبرو چې په دې خبرو کې د افغانستان ولسمشر له یاد بانک څخه غوښتنه کړې وه څو په اوسني وخت کې د هیواد له بیوزلو سره مرسته وکړي.
د مالیې وزارت سرپرست وویل چې د یادې مسئلې لپاره به مالیې وزارت نړیوال بانک ته د ولسمشرۍ عالي مقام لومړي معاونیت سره ناسته جوړه کړي څو په دې ناسته کې د مرستو په څرنګوالي هر اړخیزې خبرې وشي.
همداشان په دې خبرو کې له افغانستان سره د نړیوال بانک له لوري د ۱۰۰.۴ میلیونه امریکایې ډالرو د شوې مرستې په تدارکاتي او خدماتي مسائلو خبرې وشوې ټینګار وشو چې د عامې روغتیا وزارت او نړیوال بانک دې په یادو مسائلو خبرې وکړي څو یوې هوکړې ته ورسیږي.
د دې تر څنګ دواړو لوریو د کرونا ویروس سره د مبارزې لپاره په افغانستان کې د نړیوال بانک د روانو او نویو پروژو څخه د بودیجې په تعدیلاتو هم بحث وکړ.
د افغانستان لپاره د نړیوال بانک رئیس وویل چې موږ چمتو یو څو د نویو او روانو پروژو یوه برخه بودیجه کرونا ویروس سره د مبارزې لپاره ځانګړې کړو. پریکړه وشوه څو د افغانستان حکومت او نړیوال بانک له لوري هغه پروژې چې بودیجه یې تعدیلیږي مشخصې شي.
