د افغانستان حکومت او اروپایي ټولنې ترمنځ د دولت جوړونې قرارداد پنځلسمه تخنیکي ناسته وشوه
د مالیې وزارت د څار، تحلیل او راپور ورکونې لوی رئیس ښاغلي محمد ناصر صدیقي، او د افغانستان لپاره د اروپایي ټولنې د مرستو استازې ښاغلي ډېویډ بیرتون، په ګډه مشرۍ د دولت جوړونې قرارداد پنځلسمه تخنیکي ناسته (SRBC) د وږې میاشتې په ۲۰ مه نېټه د افغانستان حکومت او اروپایي ټولنې ترمنځ په مالیه وزارت کې وشوه.
په دې ناسته کې چې د حکومت مختلفو ادارو استازو ګډون کړی وو، د ملي بودیجې په ترتیب کې د اصلاحاتو په پلي کېدو، د حکومت د لومړیتوبونو په پام کې نیولو سره د بودیجې په اجرا، عوایدو راټولېدو او پایداره مالي ودې ته د افغانستان په رسېدو، مالیه ورکوونکو ته د اسانتیاوو په رامنځ ته کېدو، ولایتونو کې د مالیه ورکونې د دفترونو په جوړېدو، د کانونو د استخراج په برخه کې د اصلاحاتو په پرمختګ، د کانونو لپاره د راڼه قانونې چوکاټ په جوړېدو او په ولایتونو کې د کانونو په رسمي استخراج، د کانونو غیر قانوني استخراج په مخنیوي او په قانوني بڼه د کانونو د استخراج په ملاتړ، د کانونو سکټور په اصلاحاتو، اداري اصلاحاتو پلي کولو، د وړتیا له مخې د افغانستان په ملکي ادارو کې د ټیټ پوړو او لوړ پوړو مامورینو په ګمارنه، د بشري سرچینو په ښه مدیریت، د ولسي تړون له لارې د پروژو په پلي کولو، کلیو او بانډو کې د خدمتونو په وړاندي کولو او نورو ورته مسایلو په تړاو خبرې او د نظرونو تبادله وشوه.
همدا شان د حکومت د بېلابېلو ادارو د خپلو کړنو او فعالیتونو د لاسته راوړنو په تړاو ګډونوالو ته لنډ پریزینټېشن وړاندي کړ.
پرېکړه وشوه، چې د افغانستان حکومت او اروپایي ټولنه دي هڅه وکړي، څو ټول ژمنه شوي شاخصونه د روان کال ترپایه بشپړ کړي.
