د افغانستان او قزاقستان تر منځ د سوداګرۍ په برخه کې هوکړه لیک لاسلیک شو
د مالیې وزارت سرپرست او د زیربناء په چارو کې د ولسمشرۍ عالي مقام ستر سلاکار ښاغلي پروفیسور محمد همایون قیومي، د وږې میاشتې په ۲۷ مه نېټه د قزاقستان جمهوریت پتروپاولسک ښار ته سفر وکړ.
په دې سفر کې د مالیې وزارت سرپرست د شمالي قزاقستان له تولیدي تاسیساتو څخه د لیدنې تر څنګ د یاد هیواد له لوړ پوړو چارواکو او قزاقي سوداګرو سره په لیدنه کې د دوه اړخیزو مناسباتو په لا زیاتوالي او ټینګښت، د افغانستان او قزاقستان تر منځ په سوداګریزو راکړې ورکړې، په یاد هیواد کې د افغان سوداګرو د ستونزو په حلولو، د دواړو هیوادونو تر منځ په سوداګریزو هوکړه لیکونو او یو شمېر نورو اړوندو مسایلو بحث او هر اړخیزې خبرې وکړې.
همداشان د مالیې وزارت سرپرست د قزاقستان هیواد له لوړ پوړو چارواکو سره دوه اړخیز هوکړه لیک لاسلیک کړ چې له مخې به یې قزاقستان هیواد د افغانستان ستراتیژیکو ذخایرو لپاره ۱.۶ میلیونه ټنه غنم برابروي او د افغانستان سوداګریزو توکو د میوه جاتو او سبزیجاتو په ګډون به د روسیې په دریو مهمو ښارونو کې بازار موندنه کوي. په بدل کې به یې د افغانستان حکومت میوه جات، سبزیجات او تزئیني ډبرې قزاقستان هیواد ته صادروي.
