د مالیې وزارت سرپرست د وچو بندرونو په تړاو د اړوندو ادارو له مسؤلینو سره وکتل
د مالیې وزارت سرپرست او د زېربنا په چارو کې د ولسمشرۍ عالی مقام ستر سلاکار ښاغلي پروفیسور محمد همایون قیومي، د وري میاشتې په ۱۳ مه نېټه د ملي دفاع، کورنیو چارو، کرنې، اوبو لګونې او مالدارۍ، عامې روغتیا او ټرانسپورټ وزارتونو له مرستیالانو او رېل کرښې ادارې له استازې سره د وچو بندرونو په ځانګړي توګه اقینې، نیمروز او نائب اباد بندرونو په تړاو د نظرونو تبادله وکړه.
د مالیې وزارت سرپرست، د ګمرکونو لوی ریاست ته دنده وسپارله څو له اړوندو ادارو سره په همغږۍ د وچو بندرونو جوړولو پروژه د ملي تدارکاتو ادارې له لارې اعلان ته وسپاري، همدا راز یې اړوندې کمېټې ته دنده وسپارله څو د وچو بندرونو تطبیقي پلان ترتیب او راتلونکي ناستې ته یې وړاندي کړي.
