د مالیې وزارت سرپرست د کرنې وزارت له متخصصینو سره د هنګ (انغوزه) بوټي د پانګونې په پلان، کرنې او پالنې په اړه بحث وکړ
د مالیې وزارت سرپرست او د زیربناء په چارو کې د ولسمشرۍ عالي مقام ستر سلاکار ښاغلي پروفیسور محمد همایون قیومي، نن د چنګاښ میاشتې په ۱۱مه نېته د کرنې، اوبو لګونې او مالدارۍ وزارت د هنګ بوټي د پالنې برخې له متخصصینو سره وکتل.
په دې کتنه کې د مالیې وزارت سرپرست له دوی سره د کوکنارو پر ځای د یو مناسب بدیل په توګه د هنګ بوټي په کرلو، د یاد بوټي د کرلو له لارې زیاتو هیوادوالو ته د کار زمینې په رامنځته کیدو، د هنګ بوټي صادرولو له لارې د ملي عوایدو په زیاتوالي، په دې برخه کې د خصوصي سکټور په پانګونې، جنوبي اسیا او اروپایې هیوادونو کې په بازارموندنې، د هیواد له اقتصادي ودې سره د یاد بوټي په مرستې او یو شمېر نورو اړوندو مسایلو بحث او د نظرونو تبادله وکړه.
د مالیې وزارت سرپرست وویل چې د هنګ بوټي د کرلو او پالنې په برخه کې پانګونه د کرنې سکټور له لومړیتوبونو، اقتصادي ځان بسیاینې او د حکومت د پانکونې پلان یو برخه ده.
د کرنې وزارت متخصصینو یاده ونه کړه چې د هیواد په زیاتو سیمو کې د هنګ بوټي کرل مثبته پایله ورکړې او د هیواد له اقلیم سره پوره سازګاري لري. همداشان دوی د مالیې وزارت له سرپرست څخه غوښتنه وکړه چې د کرنې وزارت لخوا د یاد بوټي د کرلو هر اړخیزې طرحې له نهایې کولو څخه وروسته دې د اقتصاد عالي شورا په اجنډاء کې شامله کړي.
د مالیې وزارت سرپرست د دوی وړاندیز د منلو تر څنګ په دې برخه کې د وړتیا لوړلو او په هیواد کې د هنګ بوټي په بشپړ پروسس باندې ټینګار وکړ.
