د نورستان او کونړ ولایتونو لپاره د ښاري پراختیا ماسټر پلان لومړۍ ناسته وشوه
د نورستان، کونړ بدخشان، پنجشیر او لغمان ولایتونو لپاره د ښاري پراختیا ماسټر پلان جوړولو په اړه د افغانستان اسلامي جمهوریت ولسمشر جلالتمآب محمد اشرف غني، له حکم سره سم د مالیې وزارت سرپرست او د زېربناء په چارو کې د ولسمشرۍ عالي مقام ستر سلاکار ښاغلي پروفیسور محمد همایون قیومي، د وږې میاشتې په ۱۱ مه نېټه د نورستان له والي ښاغلي حافظ عبدالقیوم، او د کونړ له والي ښاغلي عبدالستار میرزکوال سره د یادو ولایتونو د ښاري ماسټر په تړاو وکتل.
د ښاري پراختیا د ماسټر پلانونو له جوړولو څخه موخه اقتصادي تحرک، د یادو ولایتونو نښلول چې د ټولګټو ځایونه لکه پلونه، پلچک، سړکونه او د پرمختللو ښارونو ټول استندردونه په کې شامل دي، ده چې له نړیوالو معیارونو سره سم په یادو ولایتونو کې د پوهنتونونو جوړول او پراختیا یې تر ټولو مهمه برخه ده.
په دې ناسته کې چې د سیمه ایزو ادارو رئیسانو او د ښارجوړونې او اراضي وزارت استازي هم ګډون کړې وو، د مالیې وزارت سرپرست وویل چې د ماسټر پلان له جوړولو څخه مخکې باید د سیمې له خلکو سره منظمې ناستې وشي تر څو د یادو ولایتونو په پراختیا کې د دوی اړتیاوې او نظرونه واخیستل شي او له هغه شرکت سره چې په دې برخه کې به کار کوي شریک شي.
د نوستان او کونړ ولایتونو والیانو د یادو ولایتونو لپاره پراختیایي ښاري پلان ګټور یاد کړ او د هر اړخیزې همکارۍ ډاډ یې ورکړ.
په پای کې پرېکړه وشوه، چې په نوموړو ولایتو کې د ځمکو د استملاک پلان دې سر له اوسه جوړ شوي او د مالیې وزارت، ښار جوړونې او ځمکو وزارت او د یادو ولایتونو والیان دې خپلې چارې بشپړي کړي.
د یادونې وړده، چې د جلالتمآب ولسمشر له حکم سره سم د نورستان، کونړ، بدخشان، پنجشیر او لغمان ولایتونو کې د ښاري ماسټر پلان له پلي کیدو وروسته به یاد ولایتونه د پراختیا لرونکو ولایتونو د بلوک په شان یو له بل سره ونښلول شي.
