کرونا ویروس سره د مبارزې په موخه د مالي منابعو لټولو غونډه وشوه
د افغانستان د اسلامي جمهوریت جمهوررئیس محمد اشرف غني نن له غرمې مخکې د ویډیو کنفرانس له لارې د مالیې وزارت رهبري پلاوي سره د کرونا ویروس ضد مبارزې لپاره د مالي منابعو لټولو په موخه خبرې وکړې.
په دې ویډیو کنفرانس کې کرونا ویروس سره د مبارزې په موخه د دوستو هیوادونو او بین المللي سازمانونو د یو شمېر هغو مرستو او ژمنو د انتقال په اړه چې دمخه د انکشافي پروژو په تطبیق لګول کېدې، بحث او خبرې وشو.
په دې غونډه کې پرېکړه وشوه چې د انکشافي پروژو له مصارفو څخه د پاتې پیسو لېست دې ترتیب شي، ترڅو مرسته کوونکو هیوادونو ته له مراجعې او د هغوی له توافق وروسته یادې پیسې کرونا ویروس سره په مبارزه کې مصرف شي.
