د فساد، بې غورۍ او کم کارۍ ستونزو ته د رسېدو په موخه له خلکو سره د مالیې وزارت د سرپرست مخامخ ناسته وشوه
د مالیې وزارت سرپرست محمد خالد پاینده، د فساد، بې غورۍ، کم کارۍ او د مالیې وزارت د کارکوونکو او مسؤلینو د ناوړه چلند او نورو ورته ستونزو ته د رسېدو په موخه د خلکو له مختلفو قشرونو (ملي سوداګرو، پانګوالو او عامو خلکو) سره د دې وزارت په خیبر هال کې په مستقیم ډول وکتل.
په دې لیدنه کې چې د مالیې وزارت مشرتابه غړو او کارکوونکو هم ګډون کړی وو. بېلابېلو قشرونو د عوایدي سرچینو، اصلاحاتو پلي کولو، ګمارنې په برخو کې د اصلاحاتو په راوستو او دولتي شرکتونو په برخو کې خپلې ستونزې مخامخ د مالیې وزارت له سرپرست، سره شریکې کړې او یادو ستونزو ته د رسېدو غوښتونکي شول.
د مالیې وزارت سرپرست، د دوی د ستونزو اورېدو ترڅنګ، ستونزې ډل بندي کړې او دغو ستونزو ته د رسېدو په موخه یې اړوندو مراجعو ته وړاندې کړې. نوموړي ټولو شکایت کوونکو ته ژمنه ورکړه، چې د هیواد نافذه قوانینو او امکاناتو په پام کې نیولو سره به یې ستونزو ته رسېدنه کېږي.
د یادونې وړده، چې د مالیې وزارت سرپرست، د حکومت په کچه د یوه بېساري اقدام په ترسره کولو، د پنجشنبې په ورځو له (۱-۳ بجو پورې) د مختلفو قشرونو (مالیه ورکوونکو، ملي سوداګرو، د خصوصي سکټور استازو او عامو خلکو) سره له نږدې لیدنه او خبرې کوي، څو د دوی ستونزې له نږدې واوري او د نافذه قوانینو په رڼا کې د حل لارې ورته ومومي.
هر څوک کولای شي، چې د هېواد له ګوټ ګوټ څخه د مالیې وزارت له مشرتابه سره مخامخ په ازاده توګه وویني، دوه ورځې وړاندې په دغه ایمېل پته (complaint@mof.gov.af) په ناسته کې ګډون وکړئ او یا د دفتر عمومي ریاست، د همغږۍ او څارنې ریاست، شکایتونو ته د رسېدو امریت له دغو شمېرو (0202924187) (0202924190) سره اړیکه ونیسئ.
