د رهبرۍ شورا نهمه نوبتي ناسته ترسره سوه
د مالیې وزیر الحاج ملا هدایت الله بدري، په مشرۍ د دې وزارت د رهبرۍ شورا نهمه نوبتي ناسته، چې د یو شمېر ریاستونو رئیسانو، د مقام سلاکارانو او د ګمرکاتو او عوايدو معين هم ګډون پکښي کړی وو، د قران عظیم الشان د مبارکو ایاتونو په تلاوت سره پیل سوه.
د ناستې په پیل کې د مقام رهبرۍ غړو له لوري، ګډونوالو ته لومړی د تېرې ناستي د پرمختګونو، پرېکړو، لاسته راوړنو او خنډونو بشپړ راپور وړاندي سو او ورپسې د اړوندو مسؤلینو له خوا د مالیې وزارت لپاره د ۱۴۰۱ کال پر تشکیل، د ادارو په رسمي چارو کي د هجري لمریز او هجري سپوږمیزو نېټو په کارولو او په ولایتونو کي د مستوفیتونو او ګمرکونو څخه د کورنۍ پلټنې لوی ریاست د توظیف سوي هیئت د ارزوني راپور په تړاو خبري او بحثونه وسول، همدارنګه د دولتي شرکتونو لوی ریاست غوښتنه وکړه، چي یاد ریاست غواړي د خپلو شرکتونو لپاره پراختیایي پلان جوړ کړي؛ نو د لا غوره والي لپاره دي د رهبرۍ شورای غړي خپلي مشورې او نظرونه په لیکلې بڼه د دولتي شرکتونو له لوی ریاست سره شریکي کړي.
د راپور له اورېدو وروسته د مالیې وزیر الحاج ملا هدایت الله بدري، د تېرې ناستې د پرېکړو په پرمختګونو خوښي وښوده او زیاته یې کړه، چي په کارونو کې چټکتیا او پر ټاکلي وخت دندو ته د کارکوونکو راتګ د دوی ایماني دنده ده او د روژې په مبارکه میاشت کې په صداقت او ایماندارۍ کار ترسره کول هم ثواب او هم غوره عبادت دئ. له ټولو کارکوونکو غوښتنه کوم، ترڅو په دغو مبارکو شپو او ورځو کې خپل خدمتونه لا غوره او چټک کړي.
په پای کې پرېکړه وسوه، چې د دغې ناستي د پرمختګونو، لاسته راوړنو او ورسره مخ کېدونکو خنډونو بشپړ راپور دي په را روانه ناسته کي په ډاګه او پایلې دې شریکي سي.
