د مالیې وزارت نوماند وزیر او سرپرست د افغانستان د سوداګرۍ او صنایع خونې له لومړي مرستیال او د افغانستان د سوداګرۍ او پانګونې د عامل پلاوي له رئیس سره د افغانستان د تولیداتو صادرولو لپاره په ګمرکي اسانتیاو خبرې وکړې
د مالیې وزارت نوماند وزیر او سرپرست ښاغلي عبدالهادي ارغندیوال د غبرګولي میاشتې په ۲۵ مه نېټه د افغانستان د سوداګرۍ او صنایع خونې له لومړي مرستیال ښاغلي محمد یونس مومند او د افغانستان د سوداګرۍ او پانګونې د عامل پلاوي له رئیس ښاغلي سید زمان هاشمي سره په مالیې وزرت کې وکتل.
په دې لیدنه کې د مالیې وزارت سرپرست له دوی سره په ګمرکونو کې په شته ستونزو، د افغانستان تولیداتو صادرولو لپاره د اسانتیاو په جوړیدو او تیر (TIR) ترانزیټ سیستم په اړه بحث او د نظرونو تبادله وکړه.
په کې د افغانستان د سوداګرۍ او صنایع خونې لومړي مرستیال د ګمرکونو په برخه کې د خصوصي سکټور د ستونزو په اړه خبرې وکړې. نوموړي زیاته کړه چې مالیې وزارت دې له خصوصي سکټور او ملي سوداګرو سره په دې برخه کې همکاري او مرسته وکړي. همداشان لومړي د افغانستان د کرنیزو محصولاتو صادرولو لپاره د اسانتیاو رامنځته کیدو په اړه خبرې وکړې و ویې ویل چې په نږدې راتلوونکې کې د افغانستان د میو او سبزیو فصل رسیږي او دې محصولاتو د صادرولو لپاره د نورو هیوادونو سره باید خبرې وشي او په دې برخه کې دې مالیې وزارت همکاري وکړي.
همداشان نوموړي د تیر (TIR) ترانزیټ سیستم په اړه خبرې وکړې. نوموړي وویل چې تیر سیستم یو نړیوال ترانزیټي سیستم دی چې له دې لارې ترانزیټ معیاري کیږي او له افغانستان سره د فساد په کمولو کې مرسته کوي. افغانستان کولی شي له دې سیستم څخه ګټه واخلي. نوموړي په دې برخه کې د اړتیاو پوره کولو، د اړتیا وړ قوانینو او د اړوندې زیربناء غوښتنه وکړه.
د مالیې وزارت سرپرست وویل چې موږ د خصوصي سکټور د ستونزو په ځانګړی ډول له فساد سره د مبارزې په برخه کې هر اړخیزه همکاري کړې او کو یې. نوموړي د ګمرکي کنټرول مرکزي سیستم د پرانېستې په اړه چې د فساد په کمولو کې د پام وړ رول لري او وړمه ورځ پرانېستل شو، معلومات ورکړل او زیاته یې کړه چې د دې مرکز په پرانېستلو سره د هیواد ټول ګمرکونه په اړوندو تجهیزاتو لکه د ډیجیټلي تلو نصبول، سکنرونه او کمرو باندې سمبال کیږي، خو له فساد سره د مبارزې په برخه کې د خصوصي سکټور همکارۍ ډیره مهمه ده.
د مالیې وزارت سرپرست زیاته کړه چې د افغانستان د تولیداتو صادرول زموږ له مهمو لومړیتوبونو څخه دي چې باید د نورو ادارو او خصوصي سکټور سره په همغږۍ له نورو هیوادونو سره خبرې وشي څو د افغانستان صادراتو ته مناسب بازار پیدا شي و او اړینې اسانتیاوې را منځته شي مالیې وزارت به په دې برخه کې لازمه مرسته او همکاري وکړي.
ښاغلي ارغندیوال د تیر سیستم په اړه وویل چې باید خصوصي سکټور د ګمرکونو له تخنیکي ټیم سره په دې اړه خبرې وکړي او د یادې موضوع د ټولو تخنیکي اړخونو په اړه بحث او خبرې وکړي.
د دې ناستې په پای کې، خصوصي سکټور وړاندیز وکړ چې د مالیې وزارت سرپرست دې د ویډیو کنفرانس له لارې یا هم په حضوري ډول د ولایتونو له ټولو سوداګریزو خونو سره د دوی ستونزو ته د رسیدنې په موخه خبرې وکړي.
د مالیې وزارت سرپرست وویل چې د ټولو یادو خونو سره به وګوري او ستونزو ته به یې رسیدنه وکړي.
