محمد فواد انورزی د افغان تلیکام مخابراتي شرکت عمومي رئیس په توګه وګمارل شو
په دې وروستیو کې د مالیې وزارت د وړاندیز او جمهوري ریاست عالي مقام د حکم پر بنسټ محمد فوا انورزی، د افغان تلیکام مخابراتي شرکت د عمومي رئیس په توګه وګمارل شو. نوموړی نن ورځ د مالیې وزارت سرپرست له لوري د دې شرکت کارکوونکو ته ور وپېژندل شو.
د ښاغلي انورزي، د پېژندنې په مراسمو کې د مالیې وزارت او افغان تلیکام مخابراتي شرکت یو شمېر رئیسانو او کارکوونکو ګډون کړی وو. د نوموړي شرکت نوي ګمارل شوي رئیس د جمهوري ریاست مقام او مالیې وزارت مشرتابه له باور څخه د مننې ترڅنګ، ژمنه وکړه چې ور سپارل شوې چارې به په پوره ریښتینولۍ مخ ته وړي.
د مالیې وزارت سرپرست؛ ښاغلي انورزي ته د افغان تلیکام مخابراتي شرکت د تصدۍ ورسپارلو له مبارکۍ سره، هیله وښووده چې په یاد شرکت کې به د نوموړي ګمارنه د اصلاحاتو پلي کولو او چارو د پرمختګ سبب وګرځي. نوموړي د دې شرکت له ټولو کارکوونکو وغوښتل چې له نوي ګمارل شوي رئیس سره په چارو کې ترخپلې وسې مرسته او ملتیا وکړي.
