د روان کال د چنګاښ په میاشت کي د ولایتي ګمرکونو د تر سره سوو فعالیتونو تخنیکي ارزونه وسوه
د روان کال د چنګاښ په میاشت کي د ولایتي ګمرکونو د تر سره سوو فعالیتونو د تخنیکي ارزوني ناسته نن د ګمرکونو او عوایدو معین ښاغلي ملا عبدالقاهر ادریس په مشرۍ د یاد معینیت د غونډو په تالار کي جوړه سوه.
په دې ناسته کي، چي د ګمرکونو لوی رئیس ښاغلي الحاج مفتي عبدالمتین سعید، د ګمرکونو لوی ریاست مرستیالانو، رئیسانو او د ویډیو کنفرانس له لاري د ولایتي ګمرکونو مسؤلینو ګډون کړی وو، په پیل کي د ګمرکونو او عوایدو معین ګډونوالو ته د ښه راغلاست تر څنګ اداري سلسله مراتبو ته په کتو سره له خپلو مسؤلینو څخه د اطاعت، په سمه توګه د اړوندو چارو د تر سره کولو، له مراجعینو سره د ښه سلوک، د کارکوونکو تر منځ د لازمي همغږۍ، د باور فضاء د رامنځته کېدو او یو شمېر نورو موضوعاتو په اړه ئې د ولایتي ګمرکونو مسؤلینو ته لازمي سپارښتني وکړې.
له اجنډاء سره سم د ګمرکونو لوی ریاست د پلان جوړوني، پالیسۍ، څارني او ارزوني رئیس ښاغلي محمد وسیم عثمان له لوري د روان مالي کال د چنګاښ په میاشت کي په ګمرکونو کي د تر سره سوو فعالیتونو په تړاو ټولیز راپور وړاندي سو او همدا راز په همدې موده کي د عوایدو راټولېدو، د هیواد په ټولو ګمرکونو کي تر سره سوې سوداګري، د وارداتي توکو ګمرکي ارزښت او د سوداګریزو محمولو د شمېر او ثبت سوي وزن په اړه غونډي ته بشپړ معلومات وړاندي کړل.
د غونډي ګډونوالو هم د یاد راپور په اړه هر اړخیز بحث وکړ او د چارو د لا ښه والي لپاره ئې د ولایتي ګمرکونو مسؤلینو ته لازمي سلا مشورې ورکړې.
همداراز د ولایتي ګمرکونو مسؤلینو هم په خپل وار سره په خپلو اړوندو کاري برخو کي د شته ستونزو یادونه وکړه.
د ګمرکونو لوی رئیس د دوی د ستونزو له اورېدو وروسته ډاډ ورکړ، چي ستونزو ته به ئې ژر رسیدنه وسي.
د یادوني وړ ده، چي د ګمرکونو لوی ریاست په میاشتني، ربعوار او کلني ډول د ټولو ګمرکونو تخنیکي ارزونه کوي څو شته ستونزو ته پر خپل وخت رسېدنه وسي.
