د کورنۍ پلټني عمومي ریاست د خپلو ولایتي سفرونو راپور له وزارت مقام سره شریک کړ

admin_mof
Sun, Jul 03 2022 4:36 PM
خبر

د مالیې وزارت د کورنۍ پلټني عمومي ریاست د هرات، نیمروز، فراه او بادغیس ولایتونو د ګمرک او مستوفیتونو څخه د لیدنو راپور د مالیې وزارت له رهبرۍ سره شریک کړ.

په همدې موخه د مالیې وزارت په مقام کي غونډه جوړه سوې وه، چي  پکي د مالیې وزیر الحاج ملا هدایت الله بدري، د ګمرکونو او عوایدو معین الحاج ملا محمد ناصر اخند، د ګمرکونو لوي رئیس مفتي عبدالمتین سعید او د اړوندو ادارو یو شمېر مسؤلینو ګډون کړی وو.

د کورنۍ پلټني عمومي ریاست د یادو ولایتونو د ګمرکونو او مستوفیتونو د وضعیت ارزوني؛ په ګمرکونو کي د سوداګرو د ستونزو، د سوداګریزو توکو د طی مراحلو بهیر، د سیسټمونو فعالیت، د مسلکي اشخاصو شتون، د سوداګریزو توکو اسناد، د فساد شتون، د تعرفې ټیټوالی او له همسایه هیوادونو سره د سوداګرۍ د څرنګوالي په تړاو او په دې برخو کي د موجودو ستونزو هر اخیز راپور د مالیې وزارت له رهبري سره شریک کړ.

خبر

د مالیې وزیر الحاج ملا هدایت الله بدري د راپور له اورېدو وروسته په یادو ګمرکونو او مستوفیتونو کي د شته ستونزو د حل په موخه  سپارښتنه وکړه، تر څو یاد راپور دي د ګمرکونو لوي ریاست سره په کتبي بڼه شریک سي او یاد ریاست دي د ستونزو د حل په موخه منظم پلان جوړ کړي او د یوې میاشتي په موده کي دي موجودو ستونزو ته په سمه توګه رسېدنه وسي.