د اقینې په سرحدي ګمرک کي د کورني ټرانزیټ (T1) پروسه له ګمرکي پړاوونو وایستل سوه
د مالیې وزارت د ګمرکونو لوی ریاست د سوداګرو په غوښتنه او دوی ته په ګمرکي پړاوونو کي د لا اسانتیاوو رامنځته کولو په موخه، د اقینې په سرحدي ګمرک کي د کورني ټرانزیټ (T1)پروسه له ګمرکي پړاوونو څخه وایستله.
دا چي د فاریاب محصولي ګمرک د اقینې له سرحدي ګمرک څخه له (نیم کیلو متر) څخه کمه فاصله لري؛ نو د ( T1 ) ترتیبولو پروسې د سوداګرو د وخت ضایع کېدو تر څنګ ګمرکي پړاوونه هم پېچلي کړي وه. یادو ستونزو ته په کتو سره د ګمرکونو لوی ریاست رهبرۍ پرېکړه وکړه، چي دغه پروسه له ګمرکي پړاوونو څخه وباسي.
د یادوني وړ ده، چي د ګمرکونو لوی ریاست په دې هڅه کي دئ، ترڅو د ګمرکي پړاوونو په اسانه کولو سره سوداګرو ته لا اسانتیاوي برابري کړي او په دې برخه کي د سوداګرو اصولي غوښتني هم ومني.
