د مالیې وزارت د عامه پانګوني د مدیریت ریاست د بودیجوي واحدونو (۶۶) پراختیايي پروژې تائید کړې!
د مالیې وزارت د پالیسۍ معینیت د عامه پانګوني لوی ریاست د عامه پانګوني د مدیریت ریاست له ملي لومړیتوب سره سم د اسلامي امارت اهدافو ته د رسېدو په موخه د غوره پروژو د ټاکلو، د مالي سرچینو د سپما او د پروژو د ستراتيژیک تحلیل لپاره د بودیجوي واحدونو د پراختیایي پروژو د مالي او اقتصادي تجزیې او تحلیل مسؤلیت په غاړه لري.
دغه ریاست همدارنګه د مالي او اقتصادي تحلیل، له پانګوني وړاندي پروسې او د پراختیایي پروژو د تائید په موخه د پروژو د ارزوني له کمېټې سره د ناستو د ترسره کولو د لارښود چمتو کولو او ترتیبولو مسؤلیت لري.
د عامه پانګوني د مدیریت ریاست د پروژو د ارزوني کمېټې (PEC) له لاري له پانګوني وړاندي مرحله کي د بودیجوي واحدونو ټولي نوي پراختیايي پروژې پراختیايي لومړیتوبونو ته په کتو ټاکي؛ په همدې اساس، بودجوي واحدونو ته د متحد المال په استولو او د یادي کمېټې له لاري د غونډو په جوړولو سره توانېدلی، چي د (۱۴۰۳) مالي کال لپاره (۲۱۶) پراختیايي پروژې پیدا او له دې ډلي (۱۲۱) پروژې تر تحلیل او ارزوني وروسته تائيد کړي؛ خو د پروژو د ارزوني کمېټې د پرېکړي او د اسلامي امارت د مالي محدودیتونو او پراختیايي لومړیتوبونو په پام کي نیولو سره، بالآخره (۶۶) نوي پرمختیايي پروژې د ملي بودیجې په سند کي د شاملولو په موخه تائید سوې.
د یادوني وړ ده، چي د اسلامي امارت له بیا واکمنۍ وروسته دغه ریاست یوازي هغه پروژې، چي د ملي بودیجې له لاري تمویلېږي ترلاسه او اروزي او د هغو پراختیايي لومړیتوبونو پر بنسټ، چي د افغانستان په اقتصادي کنفرانس (کرنه، روغتیا، کانونو او خصوصي سکټور) کي مطرح سوي ول ټاکي، همداراز د وزارتونو او خپلواکو ادارو پراختیايي پلانونه هم پکښي شامل دي.
