د جنوب او جنوب غرب زون د مستوفیتونو او ګمرکونو نویو ګومارل سویو کارکوونکو ته پر لیکه روزنیز پروګرام جوړ سو!
د مالیې وزارت د کارکوونکو چارو ریاست، د جنوب او جنوب غرب زون د مستوفیتونو او ګمرکونو نویو ګومارل سویو کارکوونکو ته د «مدیریت د اساساتو» تر سرلیک لاندي روزنیز پروګرام جوړ کړ.
په هغه ناسته کي، چي په همدې تړاو د دغه وزارت اداري معینیت د غونډو په تالار کي جوړه سوې وه، اداري معین مولوي دوست محمد مخلص، د روزني او ظرفیت لوړوني آمر، محمد نادر همایون، د دې وزارت د جومات ملا امام مولوي وصیف احمد احمدي او یو شمېر نویو ګومارل سویو کارکونکو پر لیکه ګډون کړی وو.
اداري معین په خپلو خبرو کي وویل، چي د هر کار اساس زده کړه او پوهه ده. د زده کړي او پوهي په واسطه کولای سو ټول کارونه په اصولي توګه تر سره کړو. نوموړي، له ګډنوالو څخه وغوښتل؛ ترڅو په پوره دقت او جدیت له دې فرصت څخه ګټه واخلي او هر هغه څه، چي دلته زده کوي یاد داشت او له نورو کارکونکوسره ئې شریک کړي.
د روزني او ظرفیت لوړوني آمر وویل، چي د دې پروګرام په مرسته تاسو کولای سئ خپلي چاري په ښه توګه مخته بوزئ، له همدې کبله له دې پروګرام څخه په ګټه اخیستو سره خپل ظرفیت لوړ کړئ او په اخلاص او پاک نیت خپلي چاري ترسره کړئ.
د یادوني وړ ده، چي یاد پروګرام به (۱۰) ورځي وغځېږي او په هغه کي به ګډونوالو ته د پلان ګذارۍ، سازماندهۍ، رهبرۍ، کنټرول، تصمیم نیوني او له کارکوونکو او مراجعینو سره د چلند په تړاو روزنه ورکړل سي.
