د مالیې وزارت د معلوماتي ټکنالوژۍ ریاست کارکوونکو ته روزنیز پروګرام ترسره سو

د مالیې وزارت د بشري سرچینو ریاست د معلوماتي ټکنالوژۍ د انسټیټیوټ (Zoombyte) په همکارۍ د دغه وزارت د معلوماتي ټکنالوژۍ ریاست د کارکوونکو د ظرفیت لوړولو په موخه روزنیز پروګرام د یو لړ مراسمو په ترڅ کي دغه وزارت په خیبرهال کي ترسره کړ.
په دې مراسمو کي د بشري سرچینو رئیس مولوي احمدشاه شاکر، مالي او اداري لوی رئیس بلال احمد قریشي، د معلوماتي ټکنالوژۍ د انسټیټیوټ رئیس استاد محمد صادق برومند او د معلوماتي ټکنالوژۍ ریاست یو شمېر کارکوونکو ګډون کړی وو.
د بشري سرچینو رئیس مولوي احمدشاه شاکر د دغه پروګرام په پرانیستې وینا کي وویل: «موږ ستاسو د مسلکي ظرفیت لوړولو په موخه د فرصتونو او امکاناتو په برابرولو سره خپل مسئولیت ادا کړ، له تاسو هم غوښتنه کوو، چي په مالیې وزارت کي د مثبت بدلون رامنځته کولو او نظام د پیاوړتیا په موخه خپل ظرفیت او مسلکي پوهه لا زیاته کړئ.»
د معلوماتي ټکنالوژۍ د انسټیټیوټ رئیس استاد محمد صادق برومند په خپلو خبرو کي وویل: «خوښ یم چي د معلوماتي ټکنالوژۍ د انسټیټیوټ (Zoombyte) په استازیتوب په دغه پروګرام کي، چي موخه ئې د مسلکي او تخصصي ظرفیتونو لوړول او د هيواد پرمختګ دئ، ګډون کوم. نوموړي له ګډونوالو وغوښتل، چي په خپلو ورځنيو کارونو کي دوو مواردو ته لومړيتوب ورکړي، د خپلو ورځنيو کارونو تر څنګ دي تخصصي پروګرامونو زده کړي او خپلي نه ستړي کېدونکي هڅي دي تل جاري وساتي او د ستونزو پر وړاندي ژر تسلیم نه سي.»

مالي او اداري لوی رئیس بلال احمد قریشي د معلوماتي ټکنالوژۍ یا زومبایټ د انسټیټیوټ له ریاست څخه د منني تر ترڅنګ وویل: «دغه ښوونیز پروګرامونه د فردي ظرفیت لوړوني، په غوره بڼه د چارو د ترسراوي، د پام وړ او د خلکو له غوښتنو سره سم خدمتونو وړاندي کولو له اړخه خورا ارزښت لري؛ نو له دې پروګرام څخه د تخصصي پوهي د لوړولو، د نظام د پیاوړتیا او د اسلامي اُمت ته د خدمت په موخه اعظمي او اغېزمنه ګټه پورته کړئ.»
د يادوني وړ ده، چي دغه پروګرام به درې میاشتي وغځېږي او ګډونوالو ته به پکښي دNetwork ، MCSE او CCNA برخي تدریس سي.