د مالیې وزارت سرپرست او د افغانستان بانک لوی رئیس د امریکا متحده ایالتونو خصوصي سکټور له استازو سره وکتل
د مالیې وزارت سرپرست او د زېربنا په چارو کې د ولسمشرۍ عالي مقام ستر سلاکار ښاغلي پروفیسور محمد همایون قیومي، د امریکا متحده ایالتونو واشنګټن ډي سي ته د نړیوال بانک او پیسو نړیوال صندوق ۲۰۱۹ کال پسرلنۍ ناستو کې د ګډون په مهال د څنډو ناستو په دوام د وري میاشتې په ۲۳ مه نېټه د امریکا متحده ایالتونو خصوصي سکټور له استازو سره وکتل.
د امریکا متحده ایالتونو خصوصي سکټور له استازو سره په کتنه کې د افغانستان مالي پانګونې په بستې، د عوایدو راټولېدو په برخه کې د افغانستان په پرمختګ، مالي اصلاحاتو پلي کېدو او اړوندو مسائلو په تړاو خبرې وشوې.
د مالیې وزارت سرپرست د امریکا متحده ایالتونو خصوصي سکټور استازو ته د افغانستان مالي پانګونې بستې او اقتصادي پرمختګونو په هکله معلومات ورکړل او د افغانستان بانک لوی رئیس د افغانستان بانکي سکټور په برخه کې اصلاحات هغوی ته تشریح کړل.
همدا شان د مالیې وزارت سرپرست او د افغانستان بانک لوی رئیس، د افغانستان د مالي پانګونې بستې مطابق د امریکا متحده ایالتونو خصوصي سکټور پانګونې ته وهڅول او هغوی هم په دې برخه کې لېوالتیا وښوده.
د ناستې په پای کې د خصوصي سکټور پوښتنو ته ځوابونه ورکړل شول.
