د مالیې وزارت سرپرست په افغانستان کې د ایټالیا سفارت له سرپرست سره په افغانستان کې د لومړیتوب لرونکو پراختیایې پروژو په اړه خبرې وکړې
د مالیې وزارت سرپرست او د زیربناء په چارو کې د ولسمشرۍ عالي مقام ستر سلاکار ښاغلي پروفیسور محمد همایون قیومي، نن د زمري میاشتې په ۲مه نېټه په افغانستان کې د ایټالیا سفارت له سرپرست ښاغلي البرتو پیټر انجیلي سره چې د ترانسپورت وزارت د ریل پټلۍ ادارې رئیس او د ایټالیا هیواد د پراختیایې همکاریو ادارې مسؤلینو هم ګډون درلود، وکتل.
په دې کتنه کې دواړو لوریو د چشت – هرات ښار تر منځ د سړک او ریل پټلۍ جوړیدو پروژې د کار په پرمختګ چې د ایټالیا هیواد له لوري تمویلیږي، د هرات ښار او شینډنډ ولسوالۍ تر منځ د برښنا د لیږد په اړه د ایټالیا هیواد په علاقمندي او د هرات ولایت د هوایې ډګر په پراختیا بحث او هر اړخیزې خبرې وکړې.
پریکړه وشوه چې د هرات ولایت د هوایې ډګر د مناسب او ښې پراختیا لپاره دې اړوندې ادارې تخنیکي ناسته وکړي او د څو بیلابیلو ګزینو څخه یوه غوره کړي تر څو د هرات ولایت د هوایې ډګر د پراخیدو عملي چارې پیل شي.
په پای کې د مالیې وزارت سرپرست د افغانستان حکومت پراختیایې لومړیتوبونو سره سم د ایټالیا هیواد د همکاریو همغږي کولو څخه له یاد هیواد نه مننه وکړه.
