د تعرفې کمېټې د روان مالي کال لومړنۍ ناسته جوړه سوه
د تعرفې کمېټې د (۱۴۰۲) مالي کال لومړنۍ ناسته د ګمرکونو او عوایدو معین ملا عبدالقاهر "ادریس" په مشرۍ د دغي کمېټې د غړو په ګډون د یاد معینیت د غونډو په تالار کي جوړه سوه.
د ګمرکونو او عوایدو معین د غونډې ګډونوالو ته ښه راغلاست وویل او له اجنډاء سره سم د ګمرکونو لوی ریاست د تعرفې رئیس د (هګیو، لوبیا کنسرو، د لاس وینځلو صابون، د دیګ بخار واشر، د الکوبان تختې او د لاسي ساعتونو) د ګمرکي تعرفې په اړه هر اړخیز معلوماتي پریزینټېشن وړاندي کړ او د یادو اقلامو د تعرفې د زیاتوالي او یا هم د کموالي په اړه ئې د سوداګرو او صنعتکاراتو غوښتني د غونډي له ګډونوالو سره شریکي کړې.
د تعرفې کمېټې غړو د ذکر سوو اقلامو په تعرفې هر اړخیز بحث وکړ او له کورني تولید څخه د ملاتړ، سوداګرۍ او دولتي عوایدو د زیاتوالي او ودې اصل ته په کتو سره ئې په اړه لازمي پرېکړې وکړې.
همداشان په دې کمېټه کي په ګمرکي طی مراحلو کي د اسانتیا رامنځته کولو په موخه د ځینو اجناسو لپاره د ملي کوډونو په جوړېدو هم پرېکړه وسوه.
