د روان کال په دوهمه ربعه کي د هیواد ګمرکي چارو (۱۰) سلنه پرمختګ کړی دئ!
د تلي ۲۴مه ۱۴۰۴هـ.ل
د مالیې وزارت د ګمرکونو لوی رئیس الحاج مولوي محمد حامد احمد په مشرۍ د روان (۱۴۰۴هـ.ل) کال په دوهمه ربعه کي په ګمرکونو کي د ترسره سويو چارو د تخنیکي ارزوني ناسته پر لیکه او حضوري بڼه وسوه.
په دې ناسته کي د ګمرکونو لوی ریاست تخنیکي او عملیاتي مرستیالانو، یو شمېر رئیسانو، آمرینو او د ویډیو کنفرانس له لاري د ولایتي ګمرکونو مسؤلینو ګډون کړی وو.
په پیل کي د ګمرکونو لوی رئیس ګډونوالو ته د ښه راغلاست ترڅنګ وویل، چي د ټولو مسئولینو د صادقانه کړنو له کبله ورځ تر بلي د هیواد د ګمرکونو چاري د ښه کېدو پر لور رواني دي. نوموړي، د ولایتي ګمرکونو مسئولینو ته سپارښتنه وکړه، چي د چارو د لا ښه والي او د ستونزو د حل له پاره له اړوندو ولایتي ادارو سره همغږي لا زیاته کړي.
ور پسې د ګمرکونو لوی ریاست د پلان جوړوني، پالیسۍ، څارني او ارزوني ریاست له لوري د روان کال په دوهمه ربعه کي په ګمرکونو کي د تر سره سویو فعالیتونو په تړاو ټولیز راپور وړاندي سو؛ په دې موده کي د عوایدو راټولېدو، د هیواد په ټولو ګمرکونو کي تر سره سوي سوداګرۍ، د وارداتي توکو ګمرکي ارزښت او د سوداګریزو محمولو د شمېر او ثبت سوي وزن په اړه غونډي ته بشپړ معلومات وړاندي کړل، چي په دې راپور کي د تېر کال د همدې مودې په پرتله د ګمرکونو چاري (۱۰،۱) سلنه مثبتي وښودل سوې.
همدارنګه د چارو د لا پرمختګ په موخه د ولایتي ګمرکونو د مسئولینو ستونزي او وړاندیزونه واورېدل سول، چي د رهبرۍ له لوري د ستونزو د حل ډاډ ورکړل سو.
