د مالیې نوماند وزیر او سرپرست: د افغانستان برېښنا شرکت ټولې پروژې دي په ښه توګه پلي شي
د مالیې نوماند وزیر او سرپرست ښاغلي عبدالهادي ارغندیوال، نن د غویي میاشتې په ۱۰ مه نېټه د افغانستان برېښنا شرکت له اجرائیوي رئیس ښاغلي امان الله غالب، سره په مالیې وزارت کې ولیدل.
په دې لیدنه کې دواړو لوریو، د برېښنا شرکت د پروژو په پرمختګ او په نا امنه سیمو کې یې په ستونزو، له مالیې وزارت سره د ځینو پروژو د مالیاتو د ستونزو په هواري، د افغانستان برېښنا شرکت په ټولو پروژو چې د اسیا پراختیایي بانک له لوري یې ملاتړ کېږي، د ۱۳۹۹ کال لپاره په مختلفو برخو کې د ۳۷ پروژو په پلي کولو، چې د ۱۳۳ میلیونه ډالرو په ارزښت یې ژمنه شوي، په روان مالي کال کې د ۱۷ پروژو په تدارکاتي پړاوونو، د انرژۍ سکټور لپاره د اسیاپراختیایي بانک له لوري د یو میلیارد ډالرو په ژمنه، چې ۶۴ سلینه یې د برېښنا شرکت ته ورکول کېږي او یو شمېر نورو اړوند مسایلو په تړاو خبرې او د نظر څرګندونې وشوې.
د مالیې وزارت سرپرست، له هغوی سره ژمنه وکړه، چې د انرژۍ سکټور او په برېښنا ځان بسیاینه د افغانستان د خلکو او حکومت لومړیتوب دی او موږ در سره همکاریو، څو ټولې پروژې له کوم ځنډ او خنډ پرته پلي شي او د پروژو دقیق راپور دي د برېښنا شرکت له لوري ترتیب کړل شي.
په پای کې پرېکړه وشوه، چې د برېښنا شرکت دي را روانه اوونۍ د پروژو راپور د مالیې وزارت ته وړاندي کړي او هغه پروژې چې په تدارکاتو پوري اړه لري د تدارکاتو له ملي ادارې او کمېسیون او د مالیاتو ستونزې به یې د عوایدو له لوی ریاست سره په همغږۍ هوارې شي
