د مالیې وزارت اداري مرستیال د ځینو مستوفیتونو کړنې او اجراآت وارزول
د مالیې وزارت اداري مرستیال ښاغلي محمد اسماعیل رحیمي، د اصلاحاتو او ملکي خدمتونو خپلواک کمېسیون د استازي په حضور کې د بامیانو، زابل، تخار، ارزګان، غزني او سرپل ولایتونو له مستوفیانو سره د ویډیو کنفرانس له لارې لیدنه او خبرې وکړې.
په دې ناسته کې چې د مالیې وزارت بشري سرچینو رئیس، د عوایدو او ګمرکونو د ولایتونو د چارو سمون رئیس، د خزاینو عمومي ریاست استازي او د مستوفیتونو اداري سلاکار حضور درلود، د ملي عوایدو راټولېدو په برخه کې د مستوفیتونو کړنې، د مالي پلانونو تحقق، د نویو عایداتي سرچینو پیدا کول، د تېرو کلونو د باقیاتو تصفیه، په اړوندو ولایتونو کې د پراختیایي او عادي بودیجې لګښت، په اړوندو ولایتونو کې له ادارو او مؤسسو سره همغږي، کاري شریکانو ته په وخت او چټک خدمتونه وړاندې کول، د بشري سرچینو د وضعیت په شمول اداري چارې او تر اثر لاندې کارکوونکو د وړتیا لوړول او نور اړوند اړخونه و ارزول شول.
په دې ناسته کې یادو مستوفیانو د ۱۳۹۸ مالي کال د کړنو او اجراآتو راپورونه وړاندې کړل او د ارزونې کمېټې د غړو پوښتنو ته یې ځوابونه وویل.
د ارزونې کمېټې د مستوفیانو د راپور او پوښتنو له اورېدو وروسته د هغوی کړنې او فعالیتونه و ارزول او د هر یوه په اړه یې لازمې پریکړې وکړې.
