د مالیې وزارت د پالیسۍ معین د ایران هیواد د مرکزي بانک او سوداګرۍ چارو له مسؤلینو سره وکتل!
د مالیې وزارت د پالیسۍ معین انجنیر سلطان محمد زبیر د ایران اسلامي جمهوریت د مرکزي بانک د نړیوالو اړیکو له مرستیال ډاکټر محسن کریمي او د دغه هیواد د سوداګرۍ او خزانه دارۍ برخي له مسؤلینو سره وکتل او د دواړو هیوادونو ترمنځ ، په مالي او اقتصادي برخو کي د دوه اړخیزو اړیکو پر پراختیا ئې خبري وکړې.
په پیل کي د مالیې وزارت د پالیسۍ معین، د ایران هیواد څخه راغلي پلاوي ته د ښه راغلاست تر څنګ، افغانستان او ایران دوه ښه ګاونډیان یاد کړل او د دوه اړخیزو، مالي او اقتصادي اړیکو د پراختیا په برخه کي ئې د هر ډول همکارۍ ډاډ ورکړ.
د ایران اسلامي جمهوریت د مرکزي بانک مرستیال، د افغانستان اسلامي امارت د پراخي اقتصاد محوره پالیسۍ د ستایني ترڅنګ؛ د دواړو هیوادونو ترمنځ د مالي او اقتصادي اړیکو پر لا پراختیا ټينګار وکړ او له افغانستان سره ئې د بانکي سکټور په برخه کي د هر ډول همکارۍ ډاډ څرګند کړ. ښاغلي کریمي همدا راز ایران هیواد ته د افغانستان له لوري، یو پلاوي ته د رسمي سفر کولو بلنه هم ورکړه.
په پای کي د مالیې وزارت د پالیسۍ معین یادونه وکړه، چي په تېر (۱۴۰۲) مالي کال کي د افغانستان اسلامي امارت د ریاست الوزرا اقتصادي مرستیال په مشرۍ یو پلاوي ایران هیواد ته د رسمي سفر په لړ کي، د دواړو هیوادونو ترمنځ پر یو شمېر مهمو موضوعاتو خبري او هوکړي وسوې؛ چي د یادو موضوعاتو په عملي کېدلو سره به، د دواړو هیوادونو مالي، سوداګریزي او اقتصادي اړیکي لا پراختیا ومومي.
