د هیواد اوو ګمرکونو ته د څه باندي دوه میلیونه امریکایي ډالرو په ارزښت د اور وژني وسایط وپېرل سول
د مرغومي ۱۱مه ۱۴۰۴هـ.ل
د مالیې وزارت د ګمرکونو لوی ریاست د هیواد په ګمرکونو کي د اور لګېدني د احتمالي ګواښونو د مخنیوي په موخه د څه باندي (۲) میلیونه او (۳۶) زره امریکایي ډالرو په ارزښت (۸) عرادې د اور وژني وسایط وپېرل.
د اور وژني دغه وسایط په تېر (۲۰۲۵)ز کال کي تولید سوي دي او هره عراده د (۱۰) زره لېټره اوبو ځایولو ظرفیت لري.
دغه پېرل سوي وسایط به د (حیرتان، آقینې، ننګرهار، هرات، فراه، نیمروز او کندهار) په ګمرکونو کي په کار واچول سي. دغه پروژه د افغانستان اسلامي امارت او ازبکستان هیواد ترمنځ د( (G2Gیا دولت په دولت په ډول قرارداد سوې وه او لګښت ئې د مالیې وزارت له پراختیایي بودیجې څخه ورکړل سوی دئ.
د یادوني وړ ده، چي د مالیې وزارت ژمن دئ، چي د هیواد ګمرکونه په پرمختللو او عصري تجهیزاتو سمبال کړي؛ څو په هیواد کي د سوداګرۍ لا ودي او د سوداګریزو توکو بشپړ خونديتوب ته ښه زمینه برابره سي.
