د وزارت مقام د دفتر عمومي ریاست

د دفتر لوی ریاست د مالیې وزارت، د غوره او چټکو اجراآتو، اغېزمنو طرحه شویو پالیسیو په پلي کولو او ټاکل شویو موخو په تحقق کې د اړیکو د یوه پیاوړي واحد په توګه شمېرل کېږي، چې عمده دندې یې د کلنیو پلانونو او نورو پروګرامونو په چوکاټ کې د پلان شویو پالیسیو او فعالیتونو له پلي کولو منظم راپور اخیستل او څارنه، د اړوندو واحدونو د کړنو څرنګوالی تحلیلول او له کورنیو او بهرنیو ادارو سره د مؤثرو اړیکو ټینګښت دی.  
د ادارې ټولو کړنو د سرنوشت په ټاکلو کې د دفتر لوی ریاست د همدې اساسي رول په نظر کې نیولوسره، د مالیې وزارت مقام تر مستقیم هدایت لاندې د اسانتیا، چټکتیا او د اداري اجراآتو د اغېزمنتوب له نظره یو لړ اصلاحي تدابیر رامنځ ته کړل، چې دغه ګام د دفتر لوی ریاست د تشکیل او کاري پروسیجرونو په چوکاټ کې د لاندې نوښتونو په توګه تر سره شو.
لومړی: د کلیدي دندو د تحلیل پر بنسټ د دفتر لوی ریاست د تشکیلاتي جوړښت اصلاح؛
دویم: د برېښنایي او ډیجیټلي سیستم جوړښت او پراختیا، چې پلي کول یې اجراآت او کړنې ګړندۍ او رڼې کوې.
درېیم: له کورنیو او بهرنیو ادارو سره د روښانه تعریف شویو کاري اړیکو په اساس د کړنو له څرنګوالې څارنه او مؤثره همغږي.
څلورم: له شته وړتیا او سرچینو څخه په ګټه اخیستنه د وړتیا لوړولو پروګرامونه تر لاس لاندي نیول؛
پنځم: د تقنیني سندونو چاپ او د اغېزمنو کاري مېکانیزمونو جوړول؛
شپږم: د دوه اړخیزه اقتصادي کمېسیونو او شورای ګانو د چارو مدیریت او یو غږي کول؛
د مالیې وزارت دفتر لوی ریاست له کلونو را پدېخوا د دندو له نویو غوښتنو سره په همغږۍ هیڅ اصلاح او پراختیا نه درلوده، د دې وزارت د کاري پالیسیو پلي کولو په برخه کې د اجراآتو خوځنده هستې او مشرۍ د مرکز په توګه ځواب ویونکی نه وو، په دې اساس او د شته کاري سرچینو تحقق کولو له مخې یې تشکیلاتي جوړښت په بنسټیزه توګه بیا وکتل شو او د ژور تحلیل پربنسټ کاري لومړیتوبونه اصلاح شول. له کورنیو او بهرنیو ادارو سره د روښانه کاري اړیکو د تعریف پر بنسټ نوي تشکیلاتي بدلونونه، یوغږي کېدل، د نویو پالیسیو طرحه او پلي کول، د لوړ پوړیو دولتي او بین الوزارتي کمېسیونو شوراګانو مسؤلیت او مسؤلو مراجعو ته منظم راپورونه ورکول ترسره شول، چې په پایله کې د لوی ریاست په تشکیلاتي تسلسل کې نوي تشکیلاتي واحدونه د منطقي کړیو په توګه په لاندي توګه تنظیم او رامنځته شول.
د همغږۍ او څارنې ریاست:
د همغږۍ او څارنې ریاست، د یوه خوځنده واحد په توګه، له کورنیو او بهرنیو ادارو سره د همغږۍ تامینولو دندې په لروسره، د ولسمشرۍ ماڼۍ مقام له لارښوونو راپور ورکول او څارنه د دولتي لوړپوړیو شوراګانو مصوبو بشپړ پلي کول او له نورو ادارو سره د دفتر لوی ریاست کاري اړیکې تنظیم او مدیریت کوي.  
د دې مسؤلیتونو ترڅنګ، تر اثر لاندې ادارو د اجراآتو له سالم او اغېزمن بهیره د ډاډ ترلاسه کول او د حکومت له لوري ملي او نړیوالو ته د مالیې وزارت لومړیتوب لرونکو کارونو او د طرحه شویو موخو د ژمنو ورکول هم د دې ریاست له دندو څخه دي، څو له شته تخنیکي وړتیاوو څخه په ګټه اخیستنه د اړوندو ادارو د کړنو پرمختګ او څرنګوالی وڅېړې، لیکلی راپور یې د دفتر لوی ریاست له لورې د مالیې وزارت مقام ته وړاندي کړي.
د اقتصاد عالي شورا د دارالانشای د چارو د همغږۍ ریاست
د اقتصاد عالي شورا د هیواد د اقتصادي ودې لپاره د ولسمشرۍ عالي مقام د ۲۰ ګڼې ۲۶-۱-۱۳۹۵ نېټې د فرمان له مخې تاسیس شوی ده چې د اقتصادي اصلاحاتو د طرحه کولو، د پالیسیو ټاکلو او پروګرامونو په اړه همغږي او پریکړې، همداشان د کورنیو او بهرنیو پانګه والو تنظیم او ملاتړ یې سترې دندې دي.
یاد ریاست، د اقتصاد عالي شورا سکرتریت پر غاړه لري چې د اجنډاء ترتیبول، د طرحو او راپورونو بررسي او تحلیل، دولتي ادارو او خصوصي سکټور ته د تخنیکي مشورو وړاندې کول، له دولتي ادارو او خصوصي سکټور سره لازمه همغږي، د مصوبو ترتیب او د اقتصاد عالي شورا د مصوبو تحقق او پیګري او یادې شورا ته راپور وړاندې کولو دندې پر غاړه لري.
د اقتصادي دوه اړخیزو کمېسیونونو ریاست
د هیواد د اقتصادي ودې په برخه کې د حکومت د هڅو په دوام، د پانګونې هڅولو او دوه اړخیزو همکاریو همداشان د بنسټیزو پروژو د پلي کیدو لپاره له (ترکمنستان، چین، پاکستان، ایران، د روسې فدراسیون، قزاقستان، ازبکستان، عربستان سعودی، متحده عربي امارات، آذربایجان او ګرجستان) هیوادونو سره دوه اړخیزه اقتصادي او سوداګریز کمېسیونونه جوړ شوي دي چې په اقتصادي او پراختیایې مهمو برخو کې د یادو هیوادونو همکارۍ جلبوي. افغانستان د اقتصادي دوه اړخیزو کمېسیونونو په چوکاټ کې د دوه اړخیزو اړیکو نوی فصل پرانیستی دی. چې دوه اړخیزې همکارۍ د سوداګرۍ، ترانزیټ، پانګونې، کلتوري اړیکې، لوړې زده کړې، روغتیا، بنسټیزې پروژې او اقتصادي سترو مسایلو په برخه کې د دواړو لوریو په خوښه دي.
د اقتصادي دوه اړخیزو کمېسیونونو ریاست په هیواد او بهر کې د اقتصادي او سوداګریزو ګډو کمېسیونونو د جوړیدو سکرتریت او همغږۍ، د وزارت د مقام هدایات، د اسانتیاوو جوړول، د اقتصادي او سوداګریزو ګډو کمېسیونونو په اړه د جلسو او لیدنو تنظیم او مدیریت، د پروتوکولونو د نهایې کولو په موخه د وزارتونو تر منځ د غونډو جوړول، د دوه اړخیزو کمېسیونونو د پریکړو او فعالیتونو د پلي کیدو لپاره بنسټیز اقدامات او د اقتصادي کمېسیونونو د جوړیدو لپاره د پلانونو جوړولو او وړاندې کولو دندې پر غاړه لري.
د بهرنیو اړیکو ریاست
د بهرنیو اړیکو ریاست د دیپلوماتیکو چارو همغږي کول، د بهرنیو سفارتونو سره د اړیکو ټینګول، ورکشاپونو، سیمینارونو، غونډو، ناستو، بهرنیو او کورنیو کنفرانسونو ته د دې وزارت د کارکوونکو معرفي کول او همداشان روزنیز او تعلیمي کورسونو او بورسیو ته د مالیې وزارت د کارکوونکو لیږل یې له سترو مسؤلیتونو څخه دي.
د اسنادو او اړیکو ریاست
د اسنادو او اړیکو ریاست د اداري د مراسلاتو تنظیم، د مالیې وزارت د ورځنیو اسنادو او مکاتیبو صادرول او واردلو دندې پر غاړه لري او د شته سیستمونو څخه د ګټې اخیستنې له لارې د دې وزارت د مراسلاتي چارو د تنظیم مسؤلیت پر غاړه لري.
همداشان د اجرائیوي اسنادو ساتل او فایلینګ، د ارشبف چارو تنظیم، د اسنادو سکن کول او نورې اړوندې دندې هم د دې ریاست له دندو څخه دي.