مالیاتي محاسبینو ته د جوازونو ورکړه به فساد کم او شفافیت زیات کړي

د مالیې وزارت د عوایدو را ټولولو، د روڼتیا رامنځته کولو او د فساد له منځه وړلو کي له ټولو هغو ممکنو لارو چارو ګټه اخلي چي دغه پروسه رڼه سي، د مالیه ورکوونکو د جذب بهیر اسانه سي او د مالیاتي محاسبینو پر مټ یې د ټولو پړاونو لړۍ په مسلکي او تخصصي ډول مخته ولاړه سي. د مالیاتو راټولولو بهیر له کوم ځانګړې طرزالعمل پرته ډېری وختونه له خنډ سره مخ وي او ترڅنګ یې د مالیه ورکوونکو تشخیص ستونزمن او دا رنګه د مالیاتو تېښتې ته لاره هواروي. همدغو مواردو ته په کتو سره د مالیې وزارت د عوایدو لوی ریاست له لوري په لومړي ځل د اسلامي امارت په حاکمیت کي مالیاتي محاسبینو ته د فعالیت جوازونه ورکړل سول. مالیاتي محاسبین هغه حقیقي وګړي دي، چي د عوایدو لوی ریاست له لوري د محاسبینو د طرزالعمل سره سم په مالیاتي چاروکي د جواز درلودونکي وي او د مالیاتي قوانینو په رڼا کي د مالیه ورکونکو له حقوقو څخه دفاع او استازولي، د مالیه ورکوونکو د مالیې سنجول، د مالیې د صورت حسابونو برابرول، د سندونو د قانوني پړاوونو تعقیبول، مشوره او تخنیکي مرسته کول یې دندې شمېرل کېږي. مالیاتي محاسبین د حکومت او ولس ترمنځ د اړیکو په ټینګولو کي ستر رول لوبوي، دوی دې ته لاره هواروي، چي دواړه لوري د ښې همکارۍ او همغږۍ له لاري په مالیاتي چارو کي روڼتیا او اسانتیا رامنځته کړي، د مالیاتو د تېښتي مخنیوی وکړي او د دوه اړخیزه سلا مشورو له لاري خپلي اړیکي پراخي کړي.
مالیاتي محاسبینو ته د فعالیت جوازونو د ورکړي لړۍ تېره ورځ د مالیې وزارت په خیبر صالون کې پیل سوه، چي د وزارت لوړ پوړو مسؤلینو او مالیاتي محاسبې جواز اخیستونکو ګډون پکښي کړی وو. مالیې وزارت د مالیاتي محاسبینو د جذب او روزني دغه پروسه د شفافیت قایمولو او د فساد د مخنیوي په موخه د مسلکي او ژمنو اشخاصو د جذب لپاره ترسره کړه او په پرلپسې ډول به روانه وي. د مالیاتي محاسبینو د روزني او جواز ورکولو دغه لړۍ به دوام ومومي او په راتلونکي کي به د هیواد په کچه علمي کدرونو او فارغ شویو محصلینو ته په دې پروسه کي د ګډون ښه فرصتونه برابر سي.
د مالیې وزارت رهبري او اړوندي ادارې، د اسلامي امارت له واکنېدو وروسته په دې هڅه کي دي، چي له تېر نظام څخه ورپاتي نیمګړي سیسټمونه فعاله کړي، د مالیاتي چارو ټولي پروسې رڼې او اسانه کړي، خپل کارکوونکي په مسلکي او تخصصي ډول وروزي او په یوه ډول غوره کاري او مسلکي ادارې رامنځته کړي. دې وزارت مالیاتي محاسبینو ته د جوازونو د ورکړي ترڅنګ د خپل پرسونل د مسلکي روزني په موخه روزنیز لنډمهال، منځمهاله او اوږدمهال پروګرامونه هم ترسره کړي دي. زموږ ګډه موخه په ځان بسیا او له اقتصادي اړخه پر پښو ولاړ افغانستان دئ او دې موخي ته د رسېدو لپاره اړینه ده، چي خپله ژمنتیا او وفاداري ثابته کړو.