نړیوال بانک ۲۰۰ میلیونه امریکایې ډالر نوی وړیا مرسته د افغانستان لپاره تصویب کړه
د نړیوال بانک اجرائیوي بورډ ۲۰۰ میلیونه امریکایې ډالر نوی وړیا مرسته د چنګاښ میاشتې په ۱۹ مه نېټه د افغانستان لپاره تصویب کړه.
یاده مرسته د افغانستان حکومت لپاره د کرونا ویروس د اقتصادي او ټولنیزو منفي اغیزو سره د مبارزې په موخه ورکړل شوې ده.
یادو پیسو څخه ۱۰۰ میلیونه امریکایې ډالر د نړیوالې پراختیایې ادارې (IDA) چې د نړیوال بانک یوه اداره ده او ۱۰۰ میلیونه نور امریکایې ډالر یې د افغانستان بیا رغونې وجهي صندوق (ARTF) مرسته ده چې د ۳۴ مرسته کوونکو بنسټونو او هیوادونو په استازیتوب یې نړیوال بانک مدیریت کوي ورکړل شوي دي.
د افغانستان حکومت به له دې نوی بستې سره، د پالیسیو پیاوړتیا، د اقتصادي حالاتو ښه کولو، د زیربناو پیاوړتیا ، روغتیایې او مخابراتي خدمتونو په برخه کې اساسي اقدامات عملي کړي.
د یادونې وړ ده چې د نړیوال بانک نوی مرسته به د افغانستان ملي بودیجې له لارې د حکومت لومړیتوبونو سره سم اغیزمنتوب او ګټورتوب ته په کتو سره ولګول شي.
