کابل ښار کي یوه اندازه ځکمه له غصب څخه خلاصه سوه!
د غویي ۲۴مه ۱۴۰۴هـ.ل
د مالیې وزارت د امارتي املاکو لوی ریاست د کابل ښار اتمي حوزې په سیمه کي له (۵۰)جریبه امارتي ځمکي څخه (۶،۵) جریبه غصب سوې ځمکه بيرته راوګرځوله.
دغه امارتي ځمکه، چي له کلونو راهیسي د یو شمېر فرصت طلبه اشخاصو له خوا نیول سوې وه او غیر قانوني کورونه پرې جوړ سوي ول، رسماً تخریب او له غصب څخه خلاصه سوه.
په دې سیمه کي ځینو کسانو په غیرقانوني فعالیتونو لاسه پوري کاوه، چي د سیمي د خلکو له پاره ئې سرخوږی پیدا کړی وو. دلته به د غیر قانوني جوړو سویو کورونو په نړولو سره د هر ډول فساد مخه ونیول سي او د خلکو له پاره به بشپړه امنیتي فضا رامنځته سي.
د یادوني وړ ده، چي په دغه امارتي ځمکه باندي به په راتلونکي کي ټولګټي پروژې پلي سي، چي په ابادۍ سربېره به د سیمي د ښکلا او یو شمېر هیوادوالو ته د کاري فرصتونو د رامنځته کولو زمینه هم برابره کړي.
