د مالیې وزارت او د افغانستان د رېل پټلۍ ادارې تر منځ د همکاریو هوکړه لیک لاسلیک شو
![خبر](/sites/default/files/2021-06/1_0_18.jpg)
د مالیې وزارت د ګمرکونو او عوایدو معین ښاغلي عالم شاه ابراهیمي نن د غبرګولي میاشتې په ۲۶مه نېټه د افغانستان د رېل پټلۍ ادارې له عملیاتي مرستیال ښاغلي میرویس غفوري سره د ګمرکونو او عوایدو په معینیت کې د همکاریو هوکړه لیک لاسلیک کړ.
د دې هوکړه لیک موخه د مالیې وزارت او د افغانستان د ریل پټلۍ ادارې په اجرااتو کې یووالي او همغږۍ، د رېلي او ګمرکي خدمتونو لپاره د دواړو ادارو د دندو او صلاحیتونو تفکیک او تشخیص، د رېل پټلۍ له لارې د سوداګرۍ او ترانزیټي اقلامو د انتقالاتو حجم په تثبیت کې روڼتیا رامنځته کول، د لا زیاتې روڼتیا تامین، د ملي عوایدو لوړول او په کاري چارو کې غوره همغږي ده.
![خبر](/sites/default/files/inline-images/2_292.jpg)
همداشان په دې هوکړه لیک کې د مالیې وزارت او د افغانستان د رېل پټلۍ ادارې مکلفیتونه او صلاحیتونه واضح شوي دي او دواړو ادارو یې پر پلي کېدو هوکړه وکړه.