کورنیو او بهرنیوموسساتو ته آنلاین روزنیز پروګرام ورکړل سو
د مالیې وزارت د عوایدو لوی ریاست تل هڅه کړې، چي ټولو مالیه ورکوونکو ته غوره خدمات وړاندي کړي. پر همدې بنسټ دا ځل د عوایدو لوی ریاست د پالیسۍ او حقوقي خدمتونو ریاست د ټولو غیر انتفاعي (کورنیو او بهرنیو) بنسټونو لپاره درې ورځنی دوه ساعته آنلاین روزنیز پروګرام پیل کړ، چي له ( ۳۰۰) څخه زیاتو کورنیو او بهرنیو بنسټونو پکښي برخه اخیستې وه.
په دې روزنیز پروګرام کي ګډونوالو ته د کلني اظهارلیک ترتیبولو، مالیاتي قوانینو او د مالیاتي معافیتونو لپاره د اړینو اسنادو د چمتو کولو په موخه لازم لارښودونه وړاندي او په وروستیو کي د مؤسساتو سوالونه هم ځواب سول.
د یادوني وړ ده، چي د دغه روزنیز پروګرام په پای کي د ټولو روزنیزو مواردو سربېره قوانین، طرزالعملونه او لارښودونه هم له ګډونوالو سره شریک سول.
