تېره اوونۍ د هیواد په بېلابېلو ولایتونو کي زیاته اندازه قاچاقي توکي نیول سوي دي!
د زمري ۱۴مه ۱۴۰۴هـ.ل
د مالیې وزارت د ګمرکونو لوی ریاست د ګرځنده څارني کارکوونکو تېره اوونۍ د هرات، کندهار، نیمروز، ننګرهار او هلمند ولایتونو په بېلابېلو سیمو کي په زیاته اندازه قاچاقي توکي نیولي دي، چي قاچاق کوونکو غوښتل له ګمرکي محصول پرته ئې په قاچاقي ډول افغانستان ته وارد کړي.
په نیول سویو توکو کي (۱۱۸۴۰) کیلو ګرامه انساني او زراعتي طبي درمل، (۴۸۹۵) کیلو ګرامه چاکلېټ، (۲۵۷۵) کیلو ګرامه ملایي، (۱۰۷۸) کیلو ګرامه رخت، (۱۳۲۰) کیلو ګرامه مۍ/ ماش، (۶۲۵) کیلو ګرامه خام نخود، (۳۰۰) کیلو ګرامه پلاسټیک، (۳۲۴) کیلو ګرامه بیسکوټ، (۳۶۰) کیلو ګرامه کیچپ، (۲۰۴) کیلو ګرامه خوراکي پوډر، (۱۶۲) کیلو ګرامه د چلم مېوه، (۱۴۴) کیلو ګرامه تمباکو، (۹۹۰) کیلو ګرامه پنیر او (۴۰) کیلو ګرامه نوې البسه شامله ده.
نیول سوي توکي او تورن کسان د نورو اجراآتو له پاره اړوندو ګمرکونو ته سپارل سوي دي.
د یادوني وړ ده، چي د مالیې وزارت د ګرځنده څارني کارکوونکي په ټول هیواد کي ګرځنده څارنه کوي او هیچا ته اجازه نه ورکوي، چي ممنوعه او قاچاقي توکي ولېږدوي.
