د مالیې وزارت سرپرست: کورنیو بې ځایه شویو او کډوالو ته د اساسي خدمتونو وړاندې کول او اقتصادي امکاناتو برابرول د افغانستان د حکومت لومړیتوب دی
د مالیې وزارت سرپرست او د زېربناء په چارو کې د ولسمشرۍ عالي مقام ستر سلاکار ښاغلي پروفیسور محمد همایون قیومي، د تلې میاشتې په ۲۲ مه نېټه په کابل کې د اروپایي ټولنې له سفیر ښاغلې پییر مایډون، سره چې د کډوالو او بېرته راستنېدونکو چارو وزارت د پناه غوښتونکو چارو مرستیالې هم شتون درلود په مالیې وزارت کې وکتل.
په دې کتنه کې دواړو لوریو د کډوالو په تړاو د افغانستان د حکومت او اروپایي ټولنې ترمنځ په دوه اړخیزه ژمنو، کورنیو بېځایه شویو او کډوالو، هغوی ته د اقتصادي امکاناتو، اسانتیاوو او اساسي خدمتونو وړاندې کولو، د ښاري پراختیا له عالي شورای د کړنلارې او پروګرامونو په تصویب، د مستحقو کډوالو او کورنیو بېځایه شویو پېژندل څو ځمکه، کاري فرصت او خدمتونه ورته وړاندې شي، له ۴۰۰،۰۰۰ زرو د زیاتو کډوالو را ستنېدل، چې ۱۰۰،۰۰۰ زره تنه یې یوازي له ترکیې هیواده دي، کډوالو د بیا جذبولو، سرچینو پیدا کولو او امکاناتو برابرولو په موخه د ترکیې هیواد او کډوالو له نړیوال سازمان سره چمتووالی او همغږي او نورو ورته مسایلو په هکله خبرې او د نظرونو تبادله وکړه
د مالیې وزارت سرپرست وویل، چې کورنیو بې ځایه شویو او کډوالو ته د اساسي خدمتونو وړاندې کول او اقتصادي امکاناتو برابرول زموږ لومړیتوبونه دي
