د مالیې وزارت سرپرست: د پیسو له نړیوال صندوق څخه غوښتنه کوم څو د افغانستان اقتصادي ځان بسیاینې ستراتېژۍ سند پلي کولو په برخه کې همکاري وکړي
د مالیې وزارت سرپرست او د زېربناء په چارو کې د ولسمشرۍ عالي مقام ستر سلاکار ښاغلي پروفیسور محمد همایون قیومي، د تلې میاشتې په ۲۶ مه نېټه د نړیوال بانک او پیسو نړیوال صندوق مدیره پلاوي د ناستې په څنډو کې د منځنۍ اسیا لپاره د پیسو نړیوال صندوق له اجرائیوي مرستیال ښاغلي میتسو هیرو فروسوا، او د منځنۍ او ختیځې اسیا لپاره د پیسو نړیوال صندوق مسؤل ښاغلي جهاد آزور، سره په جلا توګه ولیدل.
په دې لیدنو کې د مالیې وزارت سرپرست، له فساد سره د مبارزې په هلکه د افغانستان د حکومت نوې ستراتېژۍ په تړاو معلومات وړاندي کړل او ویې ویل، چې موږ له فساد او د فساد عواملو ته په جدې مبارزې ژمن یو او تر بشپړ ختمېدو پوري به دوام ورکوو.
همدا شان د مالیې وزارت سرپرست، په دې وروستیو کې د افغانستان حکومت د اقتصادي او مالي پرمختګ، مالي لګښت د کمېدو، ملي عوایدو لوړېدو، د پیسو له نړیوال صندوق سره د افغانستان حکومت د مالي او اقتصادي اصلاحاتو پروګرام د بریالي ترسره کېدو او د افغانستان حکومت د اقتصادي ځان بسیاینې د پانګه ونې د بستې په تړاو د منځنۍ اسیا لپاره د پیسو نړیوال صندوق اجرائیوي مرستیال، او د منځنۍ او ختیځې اسیا لپاره د پیسو نړیوال صندوق مسؤل ته معلومات ورکړل. ښاغلي قیومي، له هغوی غوښتنه وکړه، څو د افغانستان اقتصادي ځان بسیاینې ستراتېژۍ سند پلي کولو په برخه کې همکاري وکړي.
د مالیې وزارت سرپرست، وویل، چې د دوام لپاره باید د افغانستان اقتصادي او مالي اصلاحات، د پیسو نړیوال صندوق په نوي پروګرام کې شامل شي، چې په هغه کې په ستر اقتصاد کې د اصلاحاتو دوام ترڅنګ، په افغانستان کې د بهرنۍ پانګونې جلبېدل، کارموندنه او صادرات هم شامل شي.
د پیسو نړیوال صندوق، د افغانستان مالي او اقتصادي اصلاحاتو ته د هرکلي ترڅنګ، ډاډ ورکړ چې په نږدې راتلونکې کې به د دواړو لوریو تخنیکي او د مشرتابه ډلې د دې نوي پروګرام په تړاو بحثونه پیل کړي.
