د مالیې وزارت سرپرست د دې وزارت د کړنو راپور جمهور رئیس ته وړاندې کړ
د افغانستان د اسلامي جمهوریت جلالتماب جمهوررئیس محمد اشرف غني تېره ورځ د مالیې وزارت له رهبري پلاوي سره په کتنه کې، د یاد وزارت د کړنو راپور او پلانونه واورېدل.
په دغه کتنه کې چې په ارګ کې ترسره شوه، د مالیې سرپرست او د زیربناء په چارو کې د ولسمشرۍ عالي مقام ستر سلاکار ښاغلي پروفیسور محمد همایون قیومي د بودجې د مصرف او د عوایدو راټولولو دڅرنګوالي په اړه خپل راپور جلالتماب جمهوررئیس ته وړاندې کړ.
همداراز د مالیې وزارت سرپرست د راتلونکي کال د بودجې جوړولو او په راتلونکو دوو میاشتو کې د بودجې د مصرف په اړه چې ۱۳۹۸ مالي کال پای ته رسېږي، د وزارت د چمتو والي او پلانونو راپور جلالتماب جمهوررئیس ته وړاندې کړ.
جلالتماب جمهوررئیس د راپور تر اورېدو وروسته د مالیې وزارت له کارونو خوښي وښوده او د یاد وزارت مسوولینو ته یې لارښوونه وکړه چې د عوایدو راټولولو او مصرف په برخه کې د هیواد له ټولو والیانو سره لازمه همغږي وکړي.
جلالتماب جمهوررئیس زیاته کړه، د عادي او انکشافي بودجې د مصرف او عوایدو راټولولو په برخه کې د مالیې وزارت برنامې او اقدامات د ستاینې وړ دي.
