د ملي یووالي حکومت له پیله د افغانستان اقتصادي وده لوړې کچې ته رسېدلې
زموږ راپورونه ښیي، چې د افغانستان اقتصادي وده په روان مالي کال کې زیاته شوې ده. په ۱۳۹۷ کال کې د هیواد اقتصادي وده له ۲.۷ سلنې په ۱۳۹۸ کې ۳ سلنې ته لوړه شوې ده، د افغانستان د اقتصادي ودې مهم دلیلونه د سیمې له هیوادونو سره د هوایي دهلیزونو رامنځته کېدل، چې له دې لارې د هیواد صادرات ښه شول او د کرنې په برخه کې وده رامنځته شوې.
افغانستان یو کرنیز هیواد دی، په دې هیواد کې اقتصادي وده ډېری په کرنیز سکټور او د کرنیزو محصولاتو په صادرولو تکیه کوي. اوس مهال په ټولیزه توګه په کورنیو ناخالصو تولیداتو کې د کرنې برخه ۲۲،۳ سلنه ګڼل شوې ده.
د افغانستان اقتصادي وده په داسي حال کې زیاته شوې، چې د افغانستان د تمویلوونکو له لوري د ټاکنو په ترسره کېدو او سولې بهیر او له دواړو د راپاتي شویو ناخوالو له کبله یې د افغانستان له اقتصادي ودې په ډېر احتیاط وړاندوېینه کوله او د ۲،۷ سلنې چتر یې ورته ټاکلی وو.
د دولت د وړاندوېینې له نظره اټکل کېږي، که چېرته اقلیمي شرایط برابر وي او د افغانستان کرنیز سکټور ته کوم زیان ونه رسېږي، کرنه به ښه شي او له اوسنیو رسمي ارقامو څرګندېږي، چې په ۱۳۹۹ مالي کال کې به له ۳۳۷.۶ میلیارده افغانیو ۳۷۲.۲ میلیارده افغانیو ته (۱۰ سلنه زیاتوالی) لوړ شي.
همدا شان د افغانستان اقتصادي وده په روان کال کې تر جمیعتي ودې زیاته شوې ده. د افغانستان اقتصادي وده ۲.۱۴ سلنه ده. د افغانستان اقتصادي ودې، چې د جمیعتي ودې په پرتله زیاتوالی کړی دی، سوکالۍ او ځان بسیاینې ته هیلې زیاتوي.
د یادولو وړده، چې د ۱۳۹۹ مالي کال لپاره اقتصادي وده د ۳.۴ سلنې په شاوخوا کې ټاکل شوې، چې د ۱۳۹۸ کال په پرتله ۰،۵ سلنه ښوول شوې ده.
