د مالیې وزارت سرپرست د مالي معینیت له مسؤلینو سره ولیدل
د مالیې وزارت سرپرست محمد خالد پاینده، د دې وزارت د مالي معینیت له مسؤلینو او کارکوونکو سره ولیدل.
په دې لیدنه کې د مالیې وزارت مالي مرستیال عبدالحبیب ځدراڼ او د بودیجې عمومي ریاست رئیسانو او کارکوونکو ګډون کړی وو.
د مالیې وزارت سرپرست، د مالي معینیت له مسؤلینو او کارکوونکو څخه د ۱۴۰۰ مالي کالي ملي بودیجې د ترتیب او تصویب په تړاو مننه وکړه. نوموړي زیاته کړه، چې په ۱۴۰۱ مالي کال کې باید پوره هڅه وشي څو په ملي بودیجه کې ډېر اصلاحات راشي او پراختیایي پروژې لومړيتوبونو په پام کې نیولو په نظر کې ونیول شي.
د مالیې وزارت مالي مرستیال وویل، چې دوی په ۱۳۹۹ مالي کال کې د کرونا ویروس خپرېدو له کبله په ستونزمنو شرایطو کې د ملي بودیجې چمتو کولو او د هیواد د مالي مدیریت د ښه کولو هڅې کړې دي. نوموړي؛ زیاته کړه چې د مالي معینیت یو لړ اصلاحي پلانونه د کرونا ویروس د خپرېدو له کبله نه دي پلي شوي. ښاغلي ځدراڼ، زیاته کړه چې په ۱۴۰۰ مالي کال کې به هڅه وکړي، څو اصلاحي پروګرامونه په ښه توګه پلي شي او د اغېزمنتوب، روڼتیا، سپما او ګټورتوب په پام کې نیولو سره متوازنه بودیجه جوړه شي.
