د مالي کړنو ښه کولو په غړو ادارو(FPIP) کې د کړنو ارزونې پیل
نن ورځ د مالیې، پوهنې، کانونو او پترولیم وزارتونو، پلټنې عالي ادارې، ملي تدارکاتو ادارې او د افغانستان د استخراجي صنایع روڼتیا نوښت په سکرټریت کې د مالي ریفورم او کړنو ښه کولو د پلانونو خپلواکې ارزونې بهیر پیل شو.
د دې پروسې چې موخه یې د ادارو د مالي کړنو، لاسته راوړنو او د پلان شویو ریفورمونو پلي کولو د څارنې ارزونه، د ستونزو پېژندنه او د حل لارو موندل دي، د نړیوالو منل شویو معیارونو پر بنسټ د ملي او نړیوالو ارزوونکو له لوري به د مالیې وزارت په مشرۍ هر اړخیز و ارزول شي او بشپړ راپور به یې د روان کال غویي میاشتې په ۱۱ مه نېټه خپور شي.
کوم بنسټونه چې د عامه مالي مدیریت (PFM) په برخه کې فعالیتونه ترسره کوي، پلانونه یې په عمومي توګه د مالي کړنو ښه کولو (FPIP) پروګرام له لارې پلي کېږي. دغه پروګرام په افغانستان کې د مالي سیستمونو د ښه کېدو سبب ګرځي، چې له چوکاټونو او ښو ملي او بین المللي تجربو سره یې په برابرۍ، په هیواد کې عامه مالي مدیریت معیاري او د سیستماتیکو کړنو پر بنسټ د خدمتونو وړاندي کول ښه او پیاوړي کوي.
د مالي کړنو ښه کولو پروګرام، د هیواد د عامه مالي مدیریت سیستمونو د ریفورم پلي کولو او پیاوړي کولو په موخه د ولسمشر محمد اشرف غني په نوښت رامنځته شوی دی.
په دې پروګرام کې د پلانونو ارزونه د دریو معیارونو پرنسټ؛ په ټاکلي وخت د کړنو بشپړول، د ترسره شویو کړنو کیفیت او کړنو مؤثریت، او د ارزوونکو له لوري د اثباتیه شواهدو په پام کې نیولو سره درجه بندي کېږي.
د یادونې وړده، چې د پلانونو خپلواکې ارزونې یا کره والي بهیر، د ځاني ارزونې پروسې له بشپړېدو وروسته روښانه کېږي. ځاني ارزونه هغه بهیر دی، چې پر بنسټ یې ادارې خپلې کړنې په خپله ارزوي او د دې ارزونې له مخي هرې کړنې ته نومره ورکول کېږي، چې د خپلواکې ارزونې بهیر د ادارو خپل ځاني ارزونې ته باور ورکوي.
