د مالیې وزارت مالي مرستیال د نړیوال بانک له مرستیال سره د خصوصي سکټور په ملاتړ خبرې وکړې
د مالیې وزارت مالي مرستیال عبدالحبیب ځدران د نړیوال بانک او د پیسو نړیوال صندوق د پسرلنیو ناستو په حاشیه کې د خصوصي سکټور د پیاوړتیا (IFC) په برخه کې د نړیوال بانک له مرسیتال الفانسو ګرسیو مورا، او مل ټیم سره د ویډیو کنفرانس له لارې خبرې وکړې.
په دغه لیدنه کې په امریکا کې د افغانستان سفیرې رویا رحماني او په افغانستان کې د نړیوال بانک رئیس هنري کرالي هم ګډون درلود.
د مالیې وزارت مالي مرستیال په دې لیدنه کې په افغانستان کې د خصوصي سکټور د انرژۍ په برخه کې د پانګونې په فرصتونو، مخابراتو او معلوماتي ټکنالوژۍ، ترانسپورت، کانونو، کرنې او د خوراکي توکو د پروسس په تړاو بحث وکړ. په مقابل کې الفانسو له خپل لوري په افغانستان کې د بهرنیو پانګوالو د هڅونې او د تخنیکي مرستو له لارې د خصوصي سکټور ملاتړ او خصوصي سکټور ته د پورونو او ضمانت برابرولو په برخه کې د همکارۍ ژمنه وکړه.
