د دولتي شرکتونو د څار پلاوي ناسته وشوه
د مالیې وزارت سرپرست محمد خالد پاینده، په مشرۍ د دولتي شرکتونو د څار پلاوي ناسته انلاین ترسره شوه.
په دې ناسته کې د دولتي شرکتونو د څار پلاوي رئیس، د کانونو او پترولیم وزارت مالي اواداري مرستیال محمد حمید یوسفي، د دولتي شرکتونو د څار پلاوي غړي او د مالیې په وزارت کې د څار پلاوي غړي حاجي عبدالقیوم او د مالیې وزارت یو شمېر رئیسانو او مسؤلینو ګډون کړی وو.
په پیل کې د څار پلاوي مخکنۍ ناستې د مصوبې د کړنو راپور وړاندي شو. ورپسې له اجنډا سره سم د دولتي شرکتونو د مدیره پلاوي ټاکلو په کړنلارو، د نویو جوړو او یو ځای شویو شرکتونو مدیره پلاوي په ټاکلو، د دولتي شرکتونو د مدیره پلاوي د غیر اجرایي غړو د امتیازاتو او مزدورۍ په پالیسۍ، د دولتي شرکتونو د کارکوونکو د معاشونو په لایحې، د دولتي شرکتونو د تدارکاتي وړتیا ارزونې لپاره د کاري ډلې په ټاکلو، د ۴ نویو دولتي شرکتونو جوړولو په طرحه او یو شمېر نورو متفرقه مسایلو په تړاو بحث او لازمې پرېکړې وشوې.
په دې ناسته کې سکرتریت ته دنده وسپارل شوه، څو د څار پلاوي د سپارښتنو په پام کې نیولو سره، ځیني وړاندي شوي سندونه بیا ځلي وګوري او راتلونکي ناستې ته یې وړاندي کړي. همدا شان په ناسته کې تصویب شوه چې د دولتي شرکتونو د ښه تنظیم په موخه دي د څار پلاوي ناستې منظمې او پرلپسې ترسره شي، څو د شرکتونو چارې ټکنۍ نه شي.
