د روڼتیا رامنځته کېدو، فساد له منځه وړلو او د خلکو شکایتونو ته د رسېدو په موخه د مختلفو قشرونو له خلکو سره د مالیې وزارت د سرپرست مستقیمه ناسته وشوه
د روڼتیا رامنځته کېدو، اداري فساد له منځه وړلو او شکایتونو ته د رسېدو په موخه د مختلفو قشرونو له خلکو سره د مالیې وزارت د سرپرست مستقیمه ناسته د دې وزارت په خیبر هال کې ترسره شوه. په دې لیدنه کې چې د مالیې وزارت د مقام د دفتر عمومي رئیس عبدالخالق سرابي، د ګمرکونو عمومي رئیسې امنه احمدي، یو شمېر رئیسانو او مسؤلینو حضور درلود، د مالیې وزارت سرپرست له مختلفو اقشارو سره د لیدنې ترڅنګ د مختلفو قضایاوو، عوایدي سرچینو، د استخدام په برخه کې د اصلاحاتو راوستو او دولتي شرکتونو په برخه کې د دوی شکایتونه او ستونزې په مستقیمه توګه واورېدې. ورپسې د مالیې وزارت سرپرست اړوندو برخو ته لارښوونه وکړه، څو مختلف شکایتونه او قضایاوې ډلبنډي کړي او د نافذه قوانینو په رڼا کې جدي رسېدنه ورته وکړي.
د یادونې وړ بولو، چې د مالیې وزارت سرپرست، د یوه کم ساري اقدام په ترسره کولو دې اړین امر ته پاملرنه وکړه او (د پنجشنبې په ورځو له ۱-۳ بجو پورې) یې د مختلفو قشرونو، مالیه ورکوونکو، ملي سوداګرو، د خصوصي سکټور استازو، عامو خلکو او... ته د لیدنې لپاره ځانګړې کړي، څو له دوی سره له نږدې وګوري او خبرې ورسره وکړي او د دوی د شکایتونو او ستونزو په اورېدو اړوند بنسټونه د نافذه قوانینو په چوکاټ کې لازمې او مقتضي پرېکړې وکړي.
