له افغانستان سره د ملګرو ملتونو سازمان همکاري زیاته او دوامداره کېږي
د مالیې وزارت د سرپرست محمد خالد پاینده، په مشرۍ، چې د ملګرو ملتونو سازمان د اسیا – پاسفیک سیمه ییز رئیس نیل بوني، د یوناما د پراختیایي برخې رئیس رمیز الکباروف او ورسره مل پلاوي، د مالیې وزارت د پالیسۍ مرستیال نذیر کبیري او د یاد معینیت د همغږۍ، څارنې او راپور ورکونې عمومي رئیس سهیل کاکړ هم حضور درلود، له افغانستان سره د ملګرو ملتونو سازمان د همکاریو زیاتېدو او دوام په تړاو ناسته وشوه.
په دې ناسته کې په افغانستان کې د ملګرو ملتونو او همکارو بنسټونو له لوري د اوږدمهال پراختیایي او رفاهي خدمتونو په وړاندې کولو هر اړخیزې خبرې او د نظرونو تبادله وشوه. همدا راز ښاغلي بوني، د دوامداره همکاریو په برخه کې ډاډ ورکړ او زیاته یې کړه، چې د " One UN-One Budget" په نوم د افغانستان لپاره د ملګرو ملتونو سازمان له لوري د راتلونکو پنځو کلونو لپاره نوی پروګرام پیل شوی دی.
د مالیې وزارت سرپرست د راتلونکو پنځو کلونو لپاره په افغانستان کې د ملګرو ملتونو سازمان د نوي پروګرام هر کلی وکړ او د"On- Budget" د داخلي بودیجې لګښت او د افغانستان حکومت له لومړیتوبونو سره یوشان یې د پروګرامو په پلي کولو ټینګار وکړ. د دې ترڅنګ دواړو لوریو د وچکالۍ کړکېچ باندې بحث او د نظرونو تبادله وکړه او د واقع بینانه تدابیرو په رامنځته کېدو یې ټینګار وکړ.
