د افغانستان او ګاونډي هيواد پاکستان ترمنځ د مضاعفو مالياتو يا (Double Taxation) د مخنيوي په هکله درېيمه تخنيکي درې ورځنۍ ناسته تر سره سوه
د مضاعفو مالياتو د مخنيوي تړونونه يا (DTA) د هيوادونو ترمنځ د دوه اړخېزو اقتصادي او سوداګرۍ د ودي، تشويق او مالياتي سهولتونو د ايجاد په موخه لاسليک کېږي، چي له مخي به ئې سوداګرو ته دوه اړخېزه مالياتي سهولتونه ايجادېږي او د باندنۍ سرمايې د جلب سبب کېږي.
د ماليې وزارت هڅه کوي، چي د بېلا بېلو هيوادونو سره د مضاعفو مالياتو د مخنيوي تړونونه لاسليک کړي؛ ترڅو د دې تړونونو په وسيله و کولای سي، افغاني تجارانو ته په بهرني هيوادونو کي مالياتي سهولتونه ايجاد کړي او هم د بهرني هيوادونو څخه بهرني سوداګر افغانستان ته را جلب کړي او په افغانستان کي سرمايه ګذاري وکړي، چي دا دئ اوس د ګاونډي هيواد پاکستان سره د مضاعفو مالياتو د مخنيوي تړون، چي دوې تخنيکي ناستي ئې د تېر يوه کال په جريان کي سوي او درېيمه تخنيکي ناسته، چي نهايي ناسته وه، د فبروري له ۱ـ ۳ پوري په اسلام آباد کي ترسره سوه، چي پکښي د افغانستان په استازيتوب د ماليې وزارت اړوند د عوايدو د حقوقي خدمتونو د رئيس نداء محمد صديقي تر مشرۍ لاندي تخنيکي ټېم، چي د عوايدو تخنيکي مرستيال، ښاغلی عبدالولي نوري، د لوی اقتصاد او مالي پاليسيو رئيس ښاغلی نجيب احمدزی او د عوايدو د نړيوالو مالياتو آمر ښاغلی هدايت الله جلال ئې غړيتوب درلودی، ګډون کړی وو، چي په نتيجه کي د افغانستان او پاکستان هيوادونو ترمنځ د مضاعفو مالياتو د مخنيوي تړون مسوده په تخنيکي لحاظ تکميل او د امضاء له پاره اماده سوه، چي په نږدې راتلونکي کي به ان شاء الله د باصلاحيته مسئولينو له لوري په کابل کي امضاء سي.
د يادوني وړه ده، چي تر دې ترمخه د افغانستان له لوري د عربي متحده امارتو سره هم د مضاعفو مالياتو د مخنيوي تړون يا (DTA) د پرله پسې تخنيکي ناستو په ترڅ کي ئې مسوده تکميل سوې او د لاسليک له پاره اماده ده. همدارنګه د ګاونډي هيواد ايران او ترکيې هيواد سره هم د افغانستان له لوري د مضاعفو مالياتو د مخنيوي تړونونو باندي تخنيکي پرله پسې ناستي سوي دي او په نږدې راتلونکي کي به ئې مسودې تکميل او د لاسليک له پاره به اماده سي.
