د کورنۍ پلټني لوی رئيس او ورسره مل پلاوي پروان او کاپیسا ولایتونو ته سفر وکړ
د مالیې وزارت د کورنۍ پلټني لوی رئیس ښاغلي انجنیر عبداللطیف خالد په مشرۍ پلاوي د چارو د ارزوني په موخه پروان او کاپیسا ولایتونو ته سفر وکړ او د دغه ولایتونو له مستوفیتونو څخه ئې له نږدې لیدنه وکړه.
په همدغه مناسبت په جلا غونډه کي د پروان ولایت مستوفي ښاغلي مفتي کفایت الله حقاني او د کاپیسا ولایت مستوفي ښاغلي مولوي عبدالاحد ذوالفقار د کورنۍ پلټنې لوی ریاست پلاوي ته د هرکلي ترڅنګ د دوی د هڅو او ژمنتیا ستاینه وکړه او ډاډ ئې ورکړ، چي د چارو د اصلاح او سمون په موخه به زیار باسي، ترڅو د پلټونکو اصلاحي سپارښتني عملي او د کورنۍ پلټني لوی ریاست ته ډاډ ورکړي.
ورپسې د مالیې وزارت د کورنۍ پلټنې لوی رئیس ښاغلي انجنیر عبداللطیف خالد د پلټني په اهمیت او ارزښت خبري وکړې او زیاته ئې کړه، چي افغانستان الحمدلله اوس یو خپلواک او په ځان بسیا هيواد دئ. د نوموړي، په وینا د مالیې وزارت توانېدلی، چي یو ځل بیا سږکال خپل عوایدي هدف ته ځان ورسوي او د بوديجوي کسر څخه تر ډېره بریده مخنیوی وکړي. ښاغلي خالد ټینګار وکړ، چي د پلټني یوازینۍ موخه په اداره کي اصلاح او روڼتیا رامنځته کول دي؛ نو له همدې کبله د کورنۍ پلټني لوی ریاست هڅه کوي، چي د چارو د سمون لپاره خپلي هڅي نوري هم ګړندۍ کړي.
د یادوني وړ ده، چي یادو مستوفیتونو د مالیې وزارت د کورنۍ پلټني لوی ریاست د پلټونکو له لوري ورکړل سوي ډيري اصلاحي سپارښتني تطبیق کړي دي او د پاته سپارښتنو د ژر تر ژره عملي کولو ډاډ ئې ورکړ.
همدارنګه پروان ولایت ته د سفر په ترڅ کي، د کورنۍ پلټني لوی رئیس د پروان ولایت له والي ښاغلي الحاج مولوي عبیدالله امین زاده او مرستیال والي ښاغلي مفتي محمد ادریس انوري سره په داسي حال کي، چي د پروان ولایت مستوفي ښاغلي مفتي کفایت الله حقاني حضور درلود، ولیدل. په دغه غونډه کي د پروان ولایت مستوفي د یاد ولایت په مستوفیت کي، د خپلو کړنو او د چارو د څرنګوالي په اړه راغلي پلاوي ته بشپړ معلومات وړاندي کړل. د مالیې وزارت د کورنۍ پلټني لوی رئیس سره په خبرو کي د پروان ولایت والي د مستوفیت له لوري د ښار په مختلفو برخو کي د اصنافو د درجه بندۍ، له فساد څخه د مخنیوي او د اصنافو د غوره مدیریت په اړه د مستوفیت د کړنو ستاینه وکړه او ډاډ ئې ورکړ، چي د مالیاتو او عوایدو د راټولولو په برخه کي د لا زیاتي روڼتیا په موخه به د پروان ولایت له مستوفیت سره خپلي هراړخیزي همکارۍ ته د تل په څېر دوام ورکوي.
