د فراه ګمرک هم سوداګرو ته د لا اسانتیا رامنځته کولو په موخه ۲۴ ساعته فعالیت ته چمتو دی
د ګمرکونو عمومي ریاست هوډ لري، چي د فراه ګمرک د سوداګریزو توکو او سوداګرو ته د اسانتیا رامنځته کولو په موخه د ۲۴ ساعته فعالیت لپاره چمتو کړي. د دې ګمرک ژمن مسؤلین او کارکوونکي شپه او ورځ چمتو دي، چي ستاسو د توکو ګمرکي پړاوونو د ترسره کولو لپاره، تر ۲۴ ساعتونو پوري فعالیت وکړي.
د فراه ګمرک د هیواد له مهمو ګمرکونو څخه شمېرل کیږي، چي اوس مهال هم ۱۶ ساعته ګمرکي فعالیت کوي. که چیرته سوداګر د یاد ګمرک له ۲۴ ساعته فعالیت سره موافق وي، کولای سي چي خپل غوښتنلیکونه د فراه ګمرک او یا هم د ګمرکونو لوی ریاست ته وسپاري. له دې وړاندي نیمروز ګمرک هم د سوداګریزو توکو د چټک طی مراحلو لپاره ۲۴ ساعته فعالیت ته چمتو والی ښودلی وو.
همداشان که سوداګر وغواړي، چي د هیواد په کچه د هر ګمرک فعالیت ۲۴ ساعته سي، د ګمرکونو لوی ریاست چمتو دی چي غوښتنه ئې ومني.
