د ګمرکونو لوی رئیس د فراه ولایت له ګمرک څخه لیدنه وکړه او د سوداګرو ستونزي ئې واورېدې!
د ګمرکونو لوی رئیس الحاج مفتي عبدالمتین سعید، چي د تخنیکي پلاوي په مشرۍ فراه ولایت ته په سفر تللی، د دغه ولایت د ګمرک د چارو د ارزوني ترڅنګ ئې له سیمه ییزو سوداګرو او مسؤلینو سره هم لیدلي.
په دې لیدنه کي چي د فراه ولایت د والي مرستیال او د ګمرکونو لوی ریاست د قانون د تنفیذ رئیس ښاغلي محمد ابراهیم خلیل هم د ده ملتیا کوله، په پیل کي د سوداګرو په استازیتوب د فراه ولایت د سوداګرۍ او پانګوني خوني رئیس د وارداتي نفتي موادو، د ابو نصر فراهي ګمرک د مرستندویه میز او انټرنټ، سوداګرو ته د نویو یوزرونو د جوړېدو او مالیاتو په برخو کي د سوداګرو شته ستونزي شریکي کړې او د حل غوښتنه ئې وکړه.
د ګمرکونو لوی رئیس دوی ته ډاډ ورکړ، چي شته ستونزي به د مالیې وزارت له مقام او اړوندو ادارو سره شریکوي او وئې ویل، چي د افغانستان اسلامي امارت پالیسي داده، چي له هر اړخه د سوداګرو او پانګه والو ستونزي حل کړي او دوی ته لازمي اسانتیاوي برابري کړي.
همدا رنګه د ګمرکونو لوی رئیس او مل پلاوي د فراه ولایت د ابونصر فراهي ګمرک د مسؤلینو او کارکوونکو نظرونه او وړانديزونه هم واورېدل او په کاري برخه کي د دوی د ستونزو د ژر حل غوښتونکی سول. نوموړي د ابونصر فراهي ګمرک کارکوونکو ته سپارښتنه وکړه، چي په پوره صداقت او ایماندارۍ خپل کارونه سرته ورسوي او د خلکو ستونزو ته پر خپل وخت رسېدنه وکړي.
