د کورنۍ پلټني لوی رئیس او ورسره مل پلاوي خوست، پکتیا، پکتیکا او لوګر ولایتونو ته سفر وکړ!
د مالیې وزارت د کورنۍ پلټني لوی رئيس انجنیر عبداللطیف خالد په مشرۍ د دې ریاست یوه پلاوي د چارو د کتني او ارزوني په موخه خوست، پکتیا، پکتیکا او لوګر ولایتونو ته سفر وکړ او د دغو ولایتونو د مستوفیتونو او ګمرکونو څخه ئې لیدنه وکړه.
ښاغلي خالد، د یادو ادارو هراړخیزه ارزونه وکړه او د پرمختیايي فعالیتونو په ځانګړې توګه د ګمرکونو د عصري کولو چارو، تجهیزاتو او وسایلو څخه ئې لیدنه وکړه او اړوندو مسؤلینو او کارکوونکو سره ئې لازمي لارښووني او مشورې شریکي کړې.
نوموړي، د یادو ادارو له مسؤلینو سره په ناستو کي د پلټني د اصلاحي سپارښتنو د تطبیق په اړه هم خبري وکړې او ټینګار ئې وکړ، چي سپارښتني باید پرته له ځنډ څخه عملي او د کورنۍ پلټني لوی ریاست ته اطمینان ورکړل سي. په ورته وخت کي د کورنۍ پلټني لوی رئیس د یادو ادارو له مسؤلینو او کارکوونکو څخه مننه وکړه، چي د وروستیو پلټنو ډېری سپارښتني ئې تطبیق کړي او هیله ئې څرګنده کړه، چي پاتي سپارښتني هم ژر تر ژره پلي سي.
د دې ترڅنګ ښاغلي انجنیر عبداللطیف خالد، د دغو ادارو له کارکوونکو او هري شعبې څخه په جلا توګه لیدنه وکړه، د هغوی ستونزي او غوښتنې ئې واورېدې او ژمنه ئې ورسره وکړه، چي کابل ته له ستنېدو سره سم به د دغو ادارو ستونزي او لازمي غوښتني له اړوندو چارواکو سره شریکي کړي؛ ترڅو ئې په اړه لازم ګامونه پورته سي.
